ചങ്ങനാശേരി: നഗരത്തിന്റെയും സംസ്ഥാന ടൂറിസത്തിന്റെയും സമഗ്രവികസനത്തിനു കോട്ടയം-ചങ്ങനാശേരി ജലപാത വികസിപ്പിക്കണമെന്ന ആവശ്യം ശക്തമാകുന്നു. ഇതു സാധ്യമാകുന്നതോടെ ലോകടൂറിസം ഭൂപടത്തില്‍ പ്രമുഖസ്ഥാനം നേടിയിട്ടുള്ള കുമരകത്തിന്റെ തെക്കന്‍ കവാടമായി ചങ്ങനാശേരിയെ മാറ്റാനാവുമെന്ന അഭിപ്രായവും ശക്തമാകുന്നു.
നിലവിലുള്ള ജലപാതയുടെ വളവുകള്‍ നേരെയാക്കി ആഴം വര്‍ദ്ധിപ്പിച്ചാല്‍ സര്‍വ്വീസ് ബോട്ടുകള്‍, ഹൗസ് ബോട്ടുകള്‍, സ്പീഡ് ബോട്ടുകള്‍ എന്നിവക്ക് ഇതുവഴി കടന്നുവരാനാകുകയും ചങ്ങനാശേരിയില്‍ നിന്നും കുമരകത്തേക്കും വേമ്പനാട്ടുകായലിലേക്കും വളരെവേഗം പോകുവാനും സാധിക്കും.
ഈ പാതയുടെ ആഴം വര്‍ദ്ധിപ്പിക്കുമ്പോള്‍ ലഭിക്കുന്ന മണ്ണ് ഉപയോഗിച്ച് ജലപാതക്കു സമാന്തരമായി റോഡ് നിര്‍മിച്ചാല്‍ അത് എം.സി റോഡിന് സമാന്തരപാതയായി ഉപയോഗിച്ച് ചെറിയ വാഹനങ്ങള്‍ക്ക് അതുവഴി കടന്നുപോകുവാനും ഇത് എം.സി റോഡിലെ ഗതാഗതക്കുരുക്കിനു പരിഹാരമാകുവാനും സഹായകമാകും. കുമളി,തേക്കടി തുടങ്ങിയ കിഴക്കന്‍ മേഖലകളില്‍ നിന്നും എത്തുന്ന വിദേശിയര്‍ ഉള്‍പ്പെടെയുള്ളവര്‍ക്കും തദ്ദേശീയര്‍ക്കും 25 കി.മീറ്റര്‍ ദൂരം വരുന്ന ജലപാതയിലൂടെ കുട്ടനാടിന്റെ പ്രകൃതിഭംഗി ആസ്വദിക്കാനും ചെലവുകുറഞ്ഞ രീതിയില്‍ ചങ്ങനാശേരിയിലും കോട്ടയത്തും താമസിക്കാനുള്ള സൗകര്യങ്ങള്‍ വികസിപ്പിക്കാനും ഇടയാക്കും. ജലപാതയുടെ തീരങ്ങളില്‍ ചെറു റിസോര്‍ട്ടുകള്‍ സ്ഥാപിതമാകുന്നതോടെ കുട്ടനാടിന്റെ തനിമ നിലനിര്‍ത്തുന്നതോടൊപ്പം ഉള്‍നാടന്‍ പ്രദേശങ്ങളുടെ വികസനവും സാധ്യമാകും.
ഇതുവഴി വിവിധ രംഗങ്ങളില്‍ ഒട്ടേറെ പേര്‍ക്ക് തൊഴില്‍ ലഭിക്കാനുള്ള സാധ്യതയും ഏറെയാണ്.ജലപാതയുടെ വികസനം പ്രാവര്‍ത്തികമായാല്‍ പത്തനംതിട്ട,ഇടുക്കി,കോട്ടയം ജില്ലകളിലുള്ളവര്‍ക്ക് കുമരകത്തേക്കു പോകുവാന്‍ സഹായകമായ ഏറ്റവും നല്ല ജലപാതയായും ഇതു മാറും. ഇന്ത്യയിലെ ആദ്യത്തെ പട്ടികജാതി കോളനിയായ സചിവോത്തമപുരം കോളനി,മഹാകവി ഉള്ളൂര്‍,കേരളവര്‍മ്മ വലിയകോയിത്തമ്പുരാന്‍,എ.ആര്‍ രാജരാജവര്‍മ്മ എന്നിവരുടെ കുടുംബമായ ലക്ഷ്മീപുരം കൊട്ടാരം,എട്ടുവീട്ടില്‍ പിള്ളമാരെ കുടിയിരുത്തിയിരിക്കുന്ന വേട്ടടി ക്ഷേത്രം, തുടങ്ങിയ സ്ഥലങ്ങള്‍ സന്ദര്‍ശിക്കാനും ഉത്സവങ്ങളില്‍ പങ്കെടുക്കാനും വിദേശീയര്‍ ഉള്‍പ്പെടെയുള്ളവര്‍ക്ക് ഏറെ സഹായകമാകും. കോട്ടയം-ചങ്ങനാശേരി ജലപാതയിലുള്ള നാട്ടകം തുറമുഖത്തിന്റെ വികസനത്തിനും ഈ പാത ഏറെ പ്രയോജനപ്പെടുത്താനാവും.ഇതിനോടൊപ്പം ആലപ്പുഴ-ചങ്ങനാശേരി റോഡിനു സമാന്തരമായിട്ടുള്ള എ.സി കനാല്‍ വികസനവും കൂടിയാകുമ്പോള്‍ ചങ്ങനാശേരി നഗരത്തിനു മാത്രമല്ലാ ആലപ്പുഴയുടേയും കോട്ടയത്തിന്റെയും വികസനത്തിനും ഇത് വഴിതെളിക്കും. ഒപ്പം നാടിന്റെ നാനാഭാഗങ്ങളില്‍ നിന്നുള്ള ഒട്ടേറെ ടൂറിസ്റ്റുകളെ ഇവിടേക്ക് ആകര്‍ഷിക്കുകയും ചെയ്യും.