കൊല്‍ക്കത്ത: ഈസ്റ്റ് ബംഗാള്‍ പരിശീലകന്‍ അലയാന്‍ട്രോ മെനെന്‍ഡിസ് ക്ലബുമായി കരാര്‍ പുതുക്കി. രണ്ട് വര്‍ഷത്തേക്ക് കൂടിയാണ് ക്ലബ് മെനെന്‍ഡിസിന് കരാര്‍ നീട്ടി നല്‍കിയിട്ടുള്ളത്. 2021വരെ പരിശീലകന്‍ ടീമിനൊപ്പമുണ്ടാകും.
മെനെന്‍ഡിസ് ക്ലബുമായി കരാര്‍ പുതുക്കിയതായി ക്ലബ് അധികൃതരാണ് അറിയിച്ചത്. 2018-19 സീസണിന്റെ തുടക്കത്തിലായിരുന്നു മെനെന്‍ഡിസ് ഈസ്റ്റ് ബംഗാളിന്റെ പരിശീലകനായി ചുമതല ഏറ്റത്. യുവതാരങ്ങള്‍ക്ക് അവസരം നല്‍കി മികച്ചൊരു യുവനിരയെയ മെനെന്‍ഡിസ് തന്റെ കീഴില്‍ വാര്‍ത്തെടുത്തിട്ടുണ്ട്. മലയാളി താരമായ ജോബി ജസ്റ്റിന്‍ വളര്‍ന്ന് വന്നതും മെനെന്‍ഡിസിന് കീഴിലായിരുന്നു.
ക്ലബിന് സ്ഥിരതയുള്ളൊരു ഇലവനെ വാര്‍ത്തെടുക്കാനും മെനെന്‍ഡിസിന് കഴിഞ്ഞിട്ടുണ്ട്. ലീഗിലെ അവസാന മത്സരത്തില്‍ ജയം കൊയ്ത് കിരീടത്തിനായി കാത്തിരിക്കുകയാണ് ഈസ്റ്റ് ബംഗാള്‍. റയല്‍ മാഡ്രിഡിന്റെ യൂത്ത് ടീമുകളെ പരിശീലിപ്പിച്ച പരിശീലകനാണ് മെനെന്‍ഡിസ്.