ന്യൂഡല്‍ഹി: പാസ്‌പോര്‍ട്ട് വേണമെങ്കില്‍ മതംമാറണമെന്ന് മിശ്രവിവാഹിതരോട് ആവശ്യപ്പെട്ട സംഭവത്തില്‍ ആരോപണവിധേയനായ പാസ്‌പോര്‍ട്ട് ഓഫിസറെ ന്യായീകരിച്ച് ആര്‍.എസ്.എസ് നേതാവ് രംഗത്ത്. ഡല്‍ഹിയിലെ ആര്‍.എസ.്എസ് പ്രചാര്‍പ്രമുഖ് രാജീവ് തുലിയാണ് ഓഫിസറെ ന്യായീകരിക്കുന്നത്. ദമ്പതികളുടെ ഭാഗം മാത്രമാണ് എല്ലാവരും കേട്ടത്. ഉദ്യോഗസ്ഥന് നിരപരാധിത്വം തെളിയിക്കാന്‍ അവസരം നല്‍കണമെന്ന് രാജിവ് വിദേശകാര്യമന്ത്രി സുഷമ സ്വരാജിനോട് ആവശ്യപ്പെട്ടു. മിശ്രവിവാഹിതരായ ദമ്പതികള്‍ക്ക് പാസ്‌പോര്‍ട്ട് ലഭിക്കണമെങ്കില്‍ ഭര്‍ത്താവ് ഹിന്ദുമതത്തിലേക്ക് മാറണമെന്ന് പാസ്‌പോര്‍ട്ട് ഉദ്യോഗസ്ഥന്‍ വികാസ് മിശ്ര പറഞ്ഞതോടെയാണ് സംഭവം വിവാദമായത്. തങ്ങള്‍ക്കുണ്ടായ ദുരനുഭവം ഇവര്‍ ട്വിറ്ററില്‍ പങ്കുവയ്ക്കുകയും വിദേശകാര്യമന്ത്രി സുഷമ സ്വരാജിനെ ടാഗ് ചെയ്യുകയും ചെയ്തു. തുടര്‍ന്ന് ഉദ്യോഗസ്ഥനെ അധികാരികള്‍ സ്ഥലം മാറ്റി. എന്നാല്‍ താന്‍ നിയമം അനുസരിച്ചാണ് പ്രവര്‍ത്തിച്ചതെന്നും വിവാഹസര്‍ട്ടിഫിക്കറ്റിലെ പേരും മറ്റു രേഖകളിലെ പേരും രണ്ടായതിനാല്‍ ചോദ്യം ചെയ്യുക മാത്രമായിരിന്നുവെന്നുമാണ് പാസ്‌പോര്‍ട്ട് ഓഫിസര്‍ വികാസ്മിശ്ര പറയുന്നത്.