കൊല്ലം: പരവൂര്‍ പുറ്റിങ്ങല്‍ വെടിക്കെട്ടപകടത്തില്‍ മരണമടഞ്ഞ പൊലിസ് ഉദ്യോഗസ്ഥന്‍ സജി സെബാസ്റ്റ്യന്റേയും മറ്റുള്ളവരുടേയും ഓര്‍മകള്‍ പുതുക്കാന്‍ കേരളാ പൊലിസ് അസോസിയേഷന്‍, കേരളാ പൊലിസ് ഓഫീസേഴ്‌സ് അസോസിയേഷന്‍ കൊല്ലം ജില്ലാ കമ്മിറ്റിയുടെ നേതൃത്വത്തില്‍ സ്മരണാഞ്ജലി നടന്നു. കൊല്ലം എ.ആര്‍ ക്യാംപില്‍ നടന്ന അനുസ്മരണ പരിപാടിയില്‍ പ്രത്യേകം തയാറാക്കിയ മണ്ഡപത്തില്‍ സിറ്റി പൊലിസ് കമ്മിഷണര്‍ ഡോ. സതീഷ് ബിനോ പുഷ്പചക്രം അര്‍പ്പിച്ചു. രക്തസാക്ഷി സജി സെബാസ്റ്റ്യന്‍ പഠിച്ച വെള്ളിമണ്‍ ഗവ. യു.പി.എസില്‍ നടന്ന ചടങ്ങില്‍ അപകടസമയത്ത് ഡ്യൂട്ടിയ്ക്ക് നേതൃത്വം നല്‍കിയ സിറ്റി പൊലിസ് കമ്മീഷണര്‍ പി. പ്രകാശ്, എ.സി.പി സന്തോഷ്‌കുമാര്‍, സി.ഐ ചന്ദ്രകുമാര്‍, പൊലിസ് ഉദ്യോഗസ്ഥര്‍ എന്നിവരുടെ കൂട്ടായ്മയും സ്‌കൂളിനു മുന്നില്‍ പ്രത്യേകം സജീകരിച്ച സ്മൃതിമണ്ഡപത്തില്‍ മന്ത്രിയും സഹപ്രവര്‍ത്തകരും നാട്ടുകാരും പുഷ്പാര്‍ച്ചനയും നടത്തി. സ്‌കൂളില്‍ നിര്‍മിക്കുന്ന പുതിയകെട്ടിടത്തിന് സജിസെബാസ്റ്റ്യന്റെ പേര് നല്‍കുമെന്ന് മന്ത്രി ജെ.മേഴ്‌സിക്കുട്ടിഅമ്മ പറഞ്ഞു.
പതിനെട്ട് വര്‍ഷം പൊലിസ് സേനയില്‍ സേവനമനുഷ്ടിച്ച് ദുരന്തത്തില്‍ ജീവന്‍ പൊലിഞ്ഞ സുഹൃത്തിന്റെ അമ്മയും ഭാര്യയും രണ്ട് പെണ്‍മക്കളും അടങ്ങുന്ന കുടുംബത്തിനായി ജില്ലയിലെ പൊലിസ് സേനാംഗങ്ങളില്‍ നിന്നും ശേഖരിച്ച 10 ലക്ഷം രൂപ കുടുംബാംഗങ്ങള്‍ക്ക് മന്ത്രി കൈമാറി. സജിസെബാസ്റ്റ്യന്റെ അമ്മ ജൂലിയ, ഭാര്യ ഷെറിന്‍, മക്കളായ മെറിന്‍, ലിജിയ എന്നിവര്‍ക്കാണ് സഹായധനം കൈമാറിയത്.
കെ.പി.എ പ്രസിഡന്റ് ബി.എസ് സനോജ് അധ്യക്ഷത വഹിച്ചു. സെക്രട്ടറി ജിജു സി. നായര്‍ സ്വാഗതം പറഞ്ഞു. പി. പ്രകാശ്, ജില്ലാ പൊലിസ് മേധാവി ഡോ. സതീഷ് ബിനോ, ചിറ്റുമൂല ബ്ലോക്ക് പഞ്ചായത്ത് പ്രസിഡന്റ് എല്‍. അനില്‍, ജില്ലാ ഇന്‍ഫര്‍മേഷന്‍ ഓഫിസര്‍ അജോയ് ചന്ദ്രന്‍, അസി. കമാന്റന്റ് ആര്‍.ബൈജു, എ.സി.പി എം.എസ് സന്തോഷ്‌കുമാര്‍, കെ.പി.ഒ.എ സംസ്ഥാന പ്രസിഡന്റ്  ഡി.കെ പ്രിഥിരാജ്, എസ് ഷൈജു, സി.ഐ എസ് ചന്ദ്രകുമാര്‍, പഞ്ചായത്തംഗം ജി വിശ്വനാഥന്‍ പിള്ള, എം.സി പ്രശാന്തന്‍, എം സെയ്ഫുദ്ദീന്‍, വി.പി ബിജു, ആര്‍. രാജീവന്‍, സെബാസ്റ്റ്യന്‍, വി.ജി വിജിമോന്‍ സംസാരിച്ചു.