ന്യൂഡല്‍ഹി: പൊതുമാപ്പിനെ തുടര്‍ന്ന് കുവൈത്തില്‍ ഡീപോര്‍ട്ടേഷന്‍ കേന്ദ്രത്തില്‍ കഴിഞ്ഞിരുന്ന ഇന്ത്യക്കാരെ രാജ്യത്തെത്തിച്ചു തുടങ്ങി. ആദ്യഘട്ടത്തില്‍ 230 യാത്രക്കാരുമായി വിമാനം മധ്യപ്രദേശിലെ ഇന്‍ഡോറിലെത്തി.
ഇതില്‍ നിരവധി മലയാളികളുമുണ്ട്. കുവൈത്ത് എയര്‍വെയ്‌സ്, ജസീറ എയര്‍വെയ്‌സ് എന്നീ വിമാനങ്ങളിലാണ് ഇന്ത്യക്കാര്‍ രാജ്യത്തെത്തിയത്. ഏപ്രില്‍ മാസം ആരംഭിച്ച പൊതുമാപ്പിനെ തുടര്‍ന്ന് ആയിരക്കണക്കിന് ഇന്ത്യക്കാരാണ് നാട്ടിലെത്തുന്നതിനായി കുവൈത്ത് സര്‍ക്കാരിന്റെ പൊതുമാപ്പ് പദ്ധതി പ്രയോജനപ്പെടുത്തിയത്. എന്നാല്‍ ലോക്ക് ഡൗണിനെ തുടര്‍ന്ന് ഒരാളെപ്പോലും ഇന്ത്യയിലെത്തിക്കാന്‍ ഇതുവരെയും സാധിച്ചിരുന്നില്ല. കുവൈത്ത് സര്‍ക്കാര്‍ തന്നെ ഇവരെ നാട്ടിലെത്തിക്കാന്‍ സന്നദ്ധത അറിയിച്ചെങ്കിലും ഇന്ത്യ അനുമതി നല്‍കിയിരുന്നില്ല. ഇന്നലെ അനുമതി നല്‍കുകയും അതിവേഗം അവരെ നാട്ടിലെത്തിക്കുകയുമായിരുന്നു.