കോട്ടയം: യു.ഡി.എഫ് കണ്‍വീനര്‍ സ്ഥാനം മുന്നണിയിലെ കോണ്‍ഗ്രസിതര കക്ഷിക്ക് നല്‍കാന്‍ ആലോചനയുണ്ടെങ്കില്‍ ജേക്കബ് ഗ്രൂപ്പിന് അതിന് അര്‍ഹതയുണ്ടെന്ന് ചെയര്‍മാന്‍ ജോണി നെല്ലൂര്‍. കേരള കോണ്‍ഗ്രസ് ജേക്കബ് ഗ്രൂപ്പിന്റെ ഉന്നതാധികാര സമിതി യോഗത്തിനുശേഷം മാധ്യമപ്രവര്‍ത്തകരുമായി സംസാരിക്കുകയായിരുന്നു അദ്ദേഹം. 

കേരള കോണ്‍ഗ്രസ് എമ്മിനെ മുന്നണിയിലേക്ക് മടക്കിക്കൊണ്ടുവന്നത് സ്വാഗതാര്‍ഹമാണ്. രാജ്യസഭാ സീറ്റ് മാണി വിഭാഗത്തിന് നല്‍കേണ്ടിവരുമെന്ന് പ്രതിപക്ഷ നേതാവ് യു.ഡി.എഫ് യോഗത്തിന് മുന്‍പ് നേതാക്കളെ അറിയിച്ചിരുന്നു.
രാജ്യസഭാ സീറ്റ് വിട്ടുനല്‍കിയത് യു.ഡി.എഫിനെ ശക്തിപ്പെടുത്താനായുള്ള കോണ്‍ഗ്രസിന്റെ വിട്ടുവീഴ്ചയായാണ് കാണുന്നത്. കഴിഞ്ഞ നിയമസഭാ തെരഞ്ഞെടുപ്പിന് മുന്‍പുണ്ടായതു പോലുള്ള വിഷയങ്ങള്‍ ആവര്‍ത്തിക്കാതിരിക്കാന്‍ കോണ്‍ഗ്രസ്- ജേക്കബ് ഗ്രൂപ്പ് ഉഭയകക്ഷി ചര്‍ച്ച നടത്തണമെന്ന് പാര്‍ട്ടി ആവശ്യപ്പെടും. ലോക്‌സഭാ സീറ്റിന് പാര്‍ട്ടിക്ക് അര്‍ഹതയുണ്ട്. തെരഞ്ഞെടുപ്പ് അടുക്കുമ്പോള്‍ അത് ആവശ്യപ്പെടുമെന്നും അദ്ദേഹം പറഞ്ഞു. നേതാക്കളുടെ പരസ്യപ്രസ്താവനകള്‍ ഒഴിവാക്കി മുന്നണിയെ ശക്തിപ്പെടുത്താന്‍ നടപടി സ്വീകരിക്കണമെന്ന് യു.ഡി.എഫ് യോഗത്തില്‍ ആവശ്യപ്പെടും. കേന്ദ്രസര്‍ക്കാരിന്റെ കേരളത്തോടുള്ള അവഗണനയുടെ ഒടുവിലത്തെ ഉദാഹരണമാണ് കഞ്ചിക്കോട് കോച്ചു ഫാക്ടറി നിര്‍മാണം ഉപേക്ഷിക്കാനുള്ള നടപടികള്‍. ഇതിനെതിരേ സമരപരിപാടി സംഘടിപ്പിക്കും. വൈസ് ചെയര്‍പേഴ്‌സണ്‍ ഡെയ്‌സി ജേക്കബ്, അനൂപ് ജേക്കബ് എം.എല്‍.എ, പാര്‍ട്ടി ജന. സെക്രട്ടറിമാര്‍, മറ്റ് ഉന്നതാധികാര സമിതിയംഗങ്ങള്‍ പങ്കെടുത്തു.