ദുബൈ :യു.എ.ഇയുടെ രാഷ്ട്രപിതാവ് അന്തരിച്ച ശൈഖ് സായിദ് ബിൻ സുൽത്താൻ അൽ നഹ്യാന്റെ പൈതൃകവും കാരുണ്യവും ഉയർത്തിപ്പിടിച്ചുകൊണ്ട് 'സായിദ് മാനുഷിക ദിനത്തിൽ' (Zayed Humanitarian Day) വിപുലമായ ജീവകാരുണ്യ പ്രവർത്തനങ്ങളുമായി ദുബൈ  ജി ഡി ആർ എഫ് എ .ജീവകാരുണ്യ പ്രവർത്തനങ്ങളുടെയും സാമൂഹിക പ്രതിബദ്ധതയുടെയും സംസ്‌കാരം കൂടുതൽ ശക്തിപ്പെടുത്തുക എന്ന ലക്ഷ്യത്തോടെയാണ് ജി.ഡി.ആർ.എഫ്.എ ഈ ദിനത്തിൽ നിരവധി സാമൂഹിക സംരംഭങ്ങൾക്ക് നേതൃത്വം നൽകിയത്.

വിശുദ്ധ റമദാൻ മാസത്തിന്റെ പശ്ചാത്തലത്തിൽ തൊഴിലാളികൾക്കായി റമദാൻ ഭക്ഷ്യവസ്തുക്കൾ വിതരണം ചെയ്തു. തൊഴിലാളികളിൽ സന്തോഷം പകരുക, റമദാനിലെ ഐക്യത്തിന്റെയും കാരുണ്യത്തിന്റെയും മൂല്യങ്ങൾ അവരിലേക്ക് എത്തിക്കുക എന്നിവയായിരുന്നു ഇതിലൂടെ ലക്ഷ്യമിട്ടത്. ഇതിനുപുറമെ, വോളന്റിയർമാർ തങ്ങളുടെ കുടുംബാംഗങ്ങൾക്കൊപ്പം ഇഫ്താർ ഭക്ഷണപ്പൊതികളും വിതരണം ചെയ്തു. സമൂഹത്തിലെ പരസ്പര സഹകരണത്തിന്റെയും സന്നദ്ധസേവനത്തിന്റെയും ഉത്തമ ഉദാഹരണമായി ഈ പ്രവർത്തനങ്ങൾ മാറി.

രാഷ്ട്രപിതാവ് പകർന്നുനൽകിയ മാനുഷിക മൂല്യങ്ങളിൽ നിന്ന് പ്രചോദനം ഉൾക്കൊള്ളാനുള്ള സുപ്രധാന അവസരമാണ് സായിദ് മാനുഷിക ദിനമെന്ന് ദുബായ് ജി.ഡി.ആർ.എഫ്.എ ഡയറക്ടർ ജനറൽ ലഫ്റ്റനന്റ് ജനറൽ മുഹമ്മദ് അഹ്‌മദ്‌ അൽ മർറി പറഞ്ഞു. ഭരണതലത്തിലും സാമൂഹിക തലത്തിലും യു.എ.ഇ പിന്തുടരുന്ന അടിസ്ഥാന ശിലയാണ് ഈ മൂല്യങ്ങളെന്നും അദ്ദേഹം ഓർമ്മിപ്പിച്ചു.

"അന്തരിച്ച ശൈഖ് സായിദ് ബിൻ സുൽത്താൻ അൽ നഹ്യാൻ സ്ഥാപിച്ച ജീവകാരുണ്യ പാത വരും തലമുറകളെ എക്കാലവും പ്രചോദിപ്പിക്കും. സമൂഹത്തിൽ ജീവിതനിലവാരം മെച്ചപ്പെടുത്തുന്നതിനും ഐക്യവും കാരുണ്യവും ഊട്ടിയുറപ്പിക്കുന്നതിനും ഇത്തരം പ്രവർത്തനങ്ങൾ അനിവാര്യമാണ്," അദ്ദേഹം കൂട്ടിച്ചേർത്തു.

യു.എ.ഇയുടെ സഹിഷ്ണുതാ മൂല്യങ്ങളെ പ്രതിഫലിപ്പിക്കുന്ന ഇത്തരം സാമൂഹിക, ജീവകാരുണ്യ സംരംഭങ്ങൾ തുടർന്നും പിന്തുണയ്ക്കുമെന്ന് ദുബായ് ജി.ഡി.ആർ.എഫ്.എ വ്യക്തമാക്കി.