ഇരിട്ടി: മാക്കൂട്ടം ബ്രഹ്മഗിരി വനമേഖലയില്‍ ഉണ്ടായ ഉരുള്‍പൊട്ടലിനെ തുടര്‍ന്നുള്ള കനത്ത മലവെള്ളപാച്ചിലില്‍ ഒഴുകിയെത്തിയ മരങ്ങളുടെ കണക്കെടുപ്പ് തുടങ്ങി. ബാരാപോള്‍ മുതല്‍ പുഴ പുറമ്പോക്കുകളിലും സ്വകാര്യ വ്യക്തികളുടെ കൃഷിയിടങ്ങളിലും മറ്റുമാണ് മരത്തടികള്‍ വന്നടിഞ്ഞത്.
വനംവകുപ്പ് ഫ്‌ളൈയിങ് സ്‌ക്വാഡ് ഡി.എഫ്.ഒ സി.വി രാജന്‍, കൊട്ടിയൂര്‍ റേഞ്ചര്‍ പി. ബിനു, ഫ്‌ളൈയിങ് സ്‌ക്വാഡ് റേഞ്ചര്‍ ജയപ്രസാദ് എന്നിവരുടെ നേതൃത്വത്തിലാണ് കണക്കെടുപ്പ്.
മരങ്ങള്‍ റവന്യു വകുപ്പിന്റെ ആസ്തിയായി മുതല്‍കൂട്ടാനാണ് ശ്രമം. ലക്ഷക്കണക്കിന് രൂപ വിലവരുന്ന നൂറുകണക്കിന് കൂറ്റന്‍ മരങ്ങളാണ് മാക്കൂട്ടം വനമേഖലയില്‍നിന്ന് ഒഴുകിവന്ന് അടിഞ്ഞിരിക്കുന്നത്.
മരങ്ങള്‍ ചെറു കഷണങ്ങളാക്കി മുറിച്ചു കടത്താനുള്ള ശ്രമവും പ്രദേശവാസികളിലെ ചിലര്‍ നടത്തിയിരുന്നു. മരം മുറിച്ചുകടത്താന്‍ ശ്രമിക്കുന്നവര്‍ക്കെതിരേ കര്‍ശന നടപടികള്‍ സ്വീകരിക്കുമെന്ന് റവന്യു വകുപ്പ് അറിയിച്ചു. വനം വകുപ്പ് കൊട്ടിയൂര്‍ റേഞ്ചിന്റെ നേതൃത്വത്തില്‍ രാത്രികാലങ്ങളില്‍ റോഡുകളിലും വനമേഖലകളിലും പുഴ പുറമ്പോക്കുകളിലും വ്യാപക പരിശോധന നടത്താനും തീരുമാനിച്ചിട്ടുണ്ട്.