കണ്ണൂര്‍: സി.പി.ഐ നേതൃത്വത്തില്‍ ജില്ലയില്‍ വിഷരഹിത പച്ചക്കറി കൃഷി തുടങ്ങുന്നു. സി.പി.ഐ നേതാക്കളായിരുന്ന എന്‍.ഇ ബാലറാമിന്റെയും പി.പി മുകുന്ദന്റെയും ചരമവാര്‍ഷികത്തിന്റെ ഭാഗമായി എന്‍.ഇ ബാലറാം സ്മാരക ട്രസ്റ്റിന്റെയും സി.പി.ഐ ജില്ലാ കൗണ്‍സിലിന്റെയും സംയുക്താഭിമുഖ്യത്തിലാണു പരിപാടി. എന്‍.ഇ ബാലറാം ജൈവസംസ്‌കൃതി എന്ന പേരില്‍ വിഷരഹിത പച്ചക്കറി വ്യാപന പദ്ധതിക്കു ട്രസ്റ്റ് രൂപം നല്‍കി. പദ്ധതിയുടെ ആദ്യഘട്ടം 13 മണ്ഡലങ്ങളിലെ പത്തേക്കര്‍ ഭൂമിയില്‍ വിഷരഹിത പച്ചക്കറികൃഷി ആരംഭിക്കും. തുടര്‍ന്നു ജില്ലയിലെ പാര്‍ട്ടി അംഗങ്ങളുടെ വീടുകളില്‍ പദ്ധതി നടപ്പാക്കും. പദ്ധതിയുടെ ജില്ലാതല ഉദ്ഘാടനം 16നു ചിറ്റാരിപ്പറമ്പ് തൊടീക്കളത്ത് ഇ.കെ വിജയന്‍ എം.എല്‍.എ നിര്‍വഹിക്കും. ഓഗസ്റ്റ് ഒന്നിനു വൈകുന്നേരം നാലിന് കലക്ടറേറ്റ് മൈതാനിയില്‍ എന്‍.ഇ ബാലറാം പി.പി മുകുന്ദന്‍ അനുസ്മരണ സമ്മേളനം പന്ന്യന്‍ രവീന്ദ്രന്‍ ഉദ്ഘാടനം ചെയ്യും. കനയ്യകുമാര്‍ മുഖ്യപ്രഭാഷണം നടത്തും. വാര്‍ത്താസമ്മേളനത്തില്‍ ട്രസ്റ്റ് ചെയര്‍മാന്‍ സി.എന്‍ ചന്ദ്രന്‍, പി സന്തോഷ്‌കുമാര്‍, എ പ്രദീപന്‍, സി.പി ഷൈജന്‍ സംബന്ധിച്ചു.