ഹൈദരാബാദ്: പ്രേതങ്ങളെ ഭയന്ന് ശ്മശാനത്തിന്റെ നിര്‍മാണ ജോലി ചെയ്യാതിരുന്ന തൊഴിലാളികള്‍ക്ക് ധൈര്യം പകരാന്‍ എം.എല്‍.എ തന്നെ എത്തി. സ്ഥലം എം.എല്‍.എ ശ്മശാനത്തില്‍ തന്നെ കിടന്നുറങ്ങിയാണ് തൊഴിലാളികള്‍ക്ക് ധൈര്യം നല്‍കിയത്. തെലുങ്കുദേശം പാര്‍ട്ടി എം.എല്‍.എ നിമ്മ രാമ നായിഡുവാണ് നായകന്‍.
വെസ്റ്റ് ഗോദാവരി ജില്ലയിലെ പലകോലുളള ഹിന്ദു ശ്മശാനത്തിലാണ് വെളളിയാഴ്ച രാത്രി എം.എല്‍.എ കിടന്നുറങ്ങിയത്. ഒരു വര്‍ഷം മുന്‍പാണ് ശ്മശാനത്തിന്റെ നിര്‍മാണ പ്രവര്‍ത്തനങ്ങള്‍ക്കായി മൂന്നുകോടി രൂപ അനുവദിച്ചത്. മാസങ്ങള്‍ക്ക് മുന്‍പ് കരാര്‍ കൊടുക്കുകയും ചെയ്തു. എന്നാല്‍ പണി തുടങ്ങി അധികനാള്‍ കഴിയും മുന്‍പേ നിര്‍ത്തിവച്ചു. തൊഴിലാളികള്‍ പാതിവെന്ത മൃതശരീരങ്ങള്‍ കണ്ടതോടെ പേടിക്കുകയും പ്രേതങ്ങളെ ഭയന്ന് പണിക്ക് വരാതാവുകയും ചെയ്തതോടെയാണ് നിര്‍മാണ പ്രവര്‍ത്തനങ്ങള്‍ മുടങ്ങിയത്. തുടര്‍ന്നാണ് ശ്മാശനത്തില്‍ കിടന്നുറങ്ങാന്‍ എം.എല്‍.എ മുന്നോട്ടു വന്നത്.