തെഹ്‌റാന്‍: ഇറാന്‍ സൈന്യത്തിനെതിരേ അതിര്‍ത്തിയിലുണ്ടായ ചാവേര്‍ ആക്രമണത്തിന് പിന്നില്‍ പ്രവര്‍ത്തിച്ചവര്‍ക്കെതിരേ ശക്തമായ നടപടിയെടുക്കണമെന്ന് പാകിസ്താനോട് ഇറാന്‍ പ്രസിഡന്റ് ഹസന്‍ റൂഹാനി ആവശ്യപ്പെട്ടു. പാകിസ്താന്‍ പ്രധാനമന്ത്രി ഇമ്രാന്‍ ഖാനുമായുള്ള ടെലിഫോണ്‍ സംഭാഷണത്തിനിടെയാണ് റൂഹാനി ഇക്കാര്യം പറഞ്ഞതെന്ന് വാര്‍ത്താ ഏജന്‍സി ഇര്‍ന റിപ്പോര്‍ട്ട് ചെയ്തു.
തീവ്രവാദികള്‍ക്കെതിരേ നടപടിയെടുക്കുന്നതിനായി ഇറാന്‍ കാത്തിരിക്കുകയാണ്. വര്‍ഷങ്ങളായി ഇരു രാജ്യങ്ങളും തമ്മിലുള്ള ബന്ധം ചെറിയ തീവ്രവാദ ഗ്രൂപ്പുകളുടെ പ്രവര്‍ത്തനങ്ങളാല്‍ തടസമുണ്ടാക്കുന്നതിനെ അനുവദിക്കില്ല. ഈ ഗ്രൂപ്പുകള്‍ക്ക് ആയുധവും സാമ്പത്തിക സഹായവും നല്‍കുന്നവരെ അറിയേണ്ടതുണ്ടെന്ന് റൂഹാനി പറഞ്ഞു.

എന്നാല്‍ ഇറാന് ഉടന്‍തന്നെ മികച്ച വാര്‍ത്തയുണ്ടാവുമെന്ന് ഇമ്രാന്‍ ഖാന്‍ റൂഹാനിയോട് പറഞ്ഞു.
പാക് മണ്ണ് തീവ്രവാദികള്‍ ഉപയോഗിക്കുന്നത് അനുവദിക്കില്ല. ഇറാന്‍ നല്‍കുന്ന വിവരങ്ങള്‍ക്കനുസരിച്ച് തീവ്രവാദ സംഘടനകള്‍ക്കെതിരേ ശക്തമായ നടപടിയെടുക്കാന്‍ പാക് സൈന്യം തയാറാണെന്ന് അദ്ദേഹം പറഞ്ഞു.

ഇറാന്റെ തെക്ക് കിഴക്കന്‍ അതിര്‍ത്തിയില്‍ ഫെബ്രുവരിയിലുണ്ടായ ചാവേര്‍ ആക്രമണത്തില്‍ റവലൂഷനറി ഗാര്‍ഡിലെ 27 പേര്‍ കൊല്ലപ്പെട്ടിരുന്നു. ന്യൂനപക്ഷ വിഭാഗമായ ബലൂചിലെ ജെയ്ഷ് അല്‍ ആദില്‍ ആക്രമണത്തിന്റെ ഉത്തരവാദിത്തം ഏറ്റെടുത്തിരുന്നു. ആക്രണത്തെ തുടര്‍ന്ന് പാകിസ്താനും ഇറാനും തമ്മിലുള്ള ബന്ധങ്ങളില്‍ വിള്ളല്‍ വീണിരുന്നു.
പാകിസ്താന്‍ തീവ്രവാദികള്‍ക്ക് അഭയം നല്‍കുകയാണെന്നാണ് ഇറാന്‍ ആരോപിക്കുന്നത്.