ജിദ്ദ: മൊബൈല്‍ ഫോണ്‍മേഖലയിലെ സ്വദേശിവത്കരണത്തിന് ശേഷം വിവിധ വകുപ്പുകള്‍ സഹകരിച്ച് നടത്തിയ പരിശോധനകളില്‍ 2187 നിയമ ലംഘനങ്ങള്‍ കണ്ടെത്തി. നിയമ ലംഘനങ്ങള്‍ കണ്ടെത്തിയ 1981 സ്ഥാപനങ്ങള്‍ക്കുള്ള ശിക്ഷ നടപടികളെടുക്കാന്‍ ബന്ധപ്പെട്ട സമിതിക്ക് കൊമാറി.

 

വിവിധ മേഖലകളില്‍ 206 സ്ഥാപനങ്ഹള്‍ക്ക് മുന്നറിയിപ്പ് നല്‍കിയിട്ടുണ്ട്. ആഭ്യന്തര, വാണിജ്യം, മുനിസിപ്പാലിറ്റി, ടെലികോം എന്നിവയുമായി സഹകരിച്ച് ഈ രംഗത്തു പരിശോധന തുടരുമെന്നും നിയമ ലംഘനം ശ്രദ്ധയില്‍ പെട്ടാല്‍ വിവരമറിയിക്കണമെന്നും തൊഴില്‍ സാമൂഹിക വികസന മന്ത്രാലയ അധികൃതര്‍ അറിയിച്ചു. 

 

സെപതംബര്‍ രണ്ട് മുതലാണ് മൊബൈല്‍ ഫോണ്‍ കടകളില്‍ സമ്പൂര്‍ണ സ്വദേശിവത്കരണം നിര്‍ബന്ധമാക്കിയത്. സെപ്തംബര്‍ രണ്ടു മുതല്‍ ഏപ്രില്‍ രണ്ടു വരെയുള്ള എട്ടു മാസക്കാലത്ത് 15,892 മൊബൈല്‍ ഫോണ്‍ കടകളിലാണ് പരിശോധനകള്‍ നടത്തിയത്. കിഴക്കന്‍ പ്രവിശ്യയില്‍ 3226 ഉം റിയാദില്‍ 2086 ഉം മൊബൈല്‍ ഫോണ്‍ കടകള്‍ സമ്പൂര്‍ണ സ്വദേശിവത്കരണം നടപ്പാക്കിയതായി എട്ടു മാസത്തിനിടെ നടത്തിയ പരിശോധനയില്‍ വ്യക്തമായി. ഉത്തര അതിര്‍ത്തി പ്രവിശ്യയിലെ 170 മൊബൈല്‍ ഫോണ്‍ ഷോപ്പുകള്‍ സമ്പൂര്‍ണ സ്വദേശിവത്കരണം പാലിച്ചു. കിഴക്കന്‍ പ്രവിശ്യയില്‍ 3406 ഉം മക്ക പ്രവിശ്യയില്‍ 3150 ഉം റിയാദില്‍ 2527 ഉം അല്‍ഖസീമില്‍ 1905 ഉം അസീറില്‍ 1449 ഉം മദീനയില്‍ 1302 ഉം മൊബൈല്‍ ഫോണ്‍ ഷോപ്പുകളില്‍ എട്ടു മാസത്തിനിടെ പരിശോധനകള്‍ നടത്തി.