കയ്പമംഗലം: അമ്പത്തിരണ്ട് വര്‍ഷം മതിലകം പുതിയകാവ് മഹല്ലില്‍ സേവനം പൂര്‍ത്തിയാക്കിയ ഹാജി വി.എം കരീം മൗലവിക്ക് നാടിന്റെ ആദരം. എം.എസ്.എസ് മതിലകം യൂണിറ്റിന്റെ നേതൃത്വത്തിലാണ് കരീം മൗലവിയെ ആദരിച്ചത്.
ആയിരത്തോളം വര്‍ഷം പഴക്കമുള്ള പുതിയകാവ് ജുമുഅ മസ്ജിദില്‍ മുഅദ്ദിനായും ഇല്‍ഫത്തുല്‍ ഇസ്‌ലാം മദ്രസ അധ്യാപകനുമായാണ് കരീം മൗലവി തന്റെ പുരുഷായുസ് മുഴുവന്‍ സേവനത്തിനായി സമര്‍പ്പിച്ചത്. സംസ്ഥാന സര്‍ക്കാരിന്റെ മുസ്‌രിസ് പൈതൃക പദ്ധതിയില്‍ ഇടം നേടിയ ആരാധനാലയമാണ് പുതിയകാവ് ജുമുഅ മസ്ജിദ്.
തന്റെ ജീവിതത്തിന്റെ ഏറിയ പങ്കും കരീം മൗലവി ചിലവഴിച്ചത് പുതിയകാവ് മഹല്ലിന്റെ സേവനത്തിനാണ്. മരണം വരെ ഇനിയുള്ള കാലവും മഹല്ലിന്റെ സേവനത്തിനായി ജീവിതം സമര്‍പ്പിക്കാന്‍ തന്നെയാണ് കരീം മൗലവിയുടെ താല്‍പര്യം.
പുതിയകാവ് ഇല്‍ഫത്തുല്‍ മദ്‌റസാ ഹാളില്‍ നടന്ന ചടങ്ങില്‍ എം.എസ്.എസ് ജില്ലാ പ്രസിഡന്റ് ടി.കെ അബ്ദുള്‍ കരീം ഉപഹാരസമര്‍പണം നടത്തി. മതിലകം യൂണിറ്റ് പ്രസിഡന്റ് എന്‍.കെ അബ്ദുല്‍ റഷീദ് അധ്യക്ഷനായി. ജില്ലാ ട്രഷറര്‍ പി.എം മുഹമ്മദ് ഹാജി, യു.എം അബ്ദുല്ലക്കുട്ടി മാസ്റ്റര്‍, പി.എം മുഹമ്മദ് യൂസഫ് ഹാജി, ഹംസ കാക്കശ്ശേരി, ടി.എസ് നിസാമുദ്ദീന്‍ എന്നിവര്‍ സംസാരിച്ചു.യുണിറ്റ് സെക്രട്ടറി എം.എം അബ്ദുറഹിമാന്‍ സ്വാഗതവും വി.എ മുഹമ്മദ് റാഫി നന്ദിയും പറഞ്ഞു.