കൊടുങ്ങല്ലൂര്‍: ബൈക്കില്‍ ചുറ്റി സഞ്ചരിച്ച് യുവാക്കള്‍ക്കും വിദ്യാര്‍ഥികള്‍ക്കും കഞ്ചാവ് വില്‍പന നടത്തിവന്നിരുന്ന ഒരു യുവാവ് കൂടി എക്‌സൈസ് പിടിയിലായി.
ഇയാളുടെ ന്യൂജനറേഷന്‍ ബൈക്കും എക്‌സൈസ് സംഘം കസ്റ്റഡിയിലെടുത്തു. മൂന്നുപീടിക ബീച്ച് സ്വദേശി സഫര്‍(18) നെയാണ് അറവുശാല പരിസരത്ത് നിന്നും കഞ്ചാവ് പൊതികള്‍ സഹിതം എക്‌സൈസ് ഇന്‍സ്‌പെക്ടര്‍ ടി.കെ അഷറഫും സംഘവും അറസ്റ്റ് ചെയ്തത്. കഴിഞ്ഞദിവസം അറസ്റ്റിലായ അനീഷില്‍ നിന്നും ലഭിച്ച വിവരമനുസരിച്ചാണ് കഞ്ചാവുമായി ആവശ്യക്കാരെ തേടി അറവുശാല ഭാഗത്ത് ബൈക്കില്‍ കറങ്ങുകയായിരുന്ന സഫറിന്റെ അടുത്തേക്ക് ആവശ്യക്കാരെന്ന വ്യാജേന എക്‌സൈസുകാര്‍ മഫ്തിയിലെത്തുകയായിരുന്നു. സംശയം തോന്നിയ ഇയാള്‍ ഓടി രക്ഷപ്പെടാന്‍ ശ്രമിച്ചുവെങ്കിലും ഇയാളെ തടഞ്ഞുനിര്‍ത്തി പരിശോധിച്ചപ്പോള്‍ അടിവസ്ത്രത്തിനടിയില്‍ നിന്നും, ബൈക്കില്‍ നിന്നും കഞ്ചാവ് പൊതികള്‍ കണ്ടെത്തുകയായിരുന്നു. അഞ്ച്, പത്ത് ഗ്രാമിന്റെ ചെറിയ പൊതികളാക്കി അഞ്ഞൂറ്, ആയിരം രൂപക്കാണ് വില്‍പന നടത്തിവന്നിരുന്നത്. എക്‌സൈസ് ഉദ്യോഗസ്ഥരായ എം.ആര്‍. നെല്‍സണ്‍, ടി.ആര്‍. സുനില്‍, ടി.കെ. അബ്ദുള്‍നിയാസ്, ടി.എസ്. സുനില്‍കുമാര്‍, സി.കെ. ചന്ദ്രന്‍, പി.ആര്‍. സുനില്‍കുമാര്‍, ഫ്രെന്‍സി എന്നിവരടങ്ങിയ സംഘമാണ് ഇയാളെ പിടികൂടിയത്.