ഗ്വാളിയോര്‍: മധ്യപ്രദേശിലെ ഗ്വാളിയോറില്‍ മൂന്ന് നില കെട്ടിടത്തിലുണ്ടായ തീപിടിത്തത്തില്‍ ഏഴുപേര്‍ കൊല്ലപ്പെട്ടു. മൂന്ന് കുട്ടികളും നാലു സ്ത്രീകളുമാണ് മരിച്ചത്. നിരവധിപേര്‍ക്ക് പരുക്കേറ്റു. ഇവരെ ആശുപത്രിയില്‍ പ്രവേശിപ്പിച്ചു. ഇതില്‍ കെട്ടിടം ഉടമ ഹരി ഓം ഗോയല്‍ ഉള്‍പ്പെടെ മൂന്നുപേരുടെ നില ഗുരുതരമാണ്. ഏതാനും പേരെ കെട്ടിടത്തിന് അകത്ത് നിന്നും രക്ഷപ്പെടുത്തി. വ്യോമസേനയുടെ ഫയര്‍ എന്‍ജിനുകള്‍ എത്തിയാണ് തീയണച്ചത്. റെസിഡന്‍ഷ്യല്‍ കോംപ്ലക്‌സിലെ ആദ്യ നിലയിലുള്ള പെയിന്റ് ഷോപ്പിലാണ് തീപിടിത്തമുണ്ടായത്. തുടര്‍ന്ന് കെട്ടിടമാകെ തീ പടരുകയായിരുന്നു. കെട്ടിടത്തിന്റെ രണ്ടാംനിലയില്‍ കുടുങ്ങിയവരാണ് മരിച്ചതെന്ന് പൊലിസ് പറഞ്ഞു.