കോട്ടയം: വാക്കേറ്റത്തിനിടെ തോക്കെടുത്തു കൊല്ലുമെന്ന് ഭീഷണിപ്പെടുത്തിയ സംഭവത്തില്‍ പ്രതി പിടിയില്‍.
 മണര്‍കാട് പാറയില്‍ ബെിന്ന(50)യെയാണ് മണര്‍കാട് പൊലിസ് അറസ്റ്റ് ചെയ്തത്. ചൊവ്വാഴ്ച്ച രാത്രി  മണര്‍കാട് പള്ളിക്ക് സമീപമാണ് കേസിനാസ്പദമായ സംഭവമുണ്ടായത്. സംഭവത്തെക്കുറിച്ച് പൊലിസ് പറയുന്നതിങ്ങനെ ബെന്നിയും സുഹൃത്തും മദ്യലഹരിയില്‍ കാറോടിച്ചുവെന്നാരോപിച്ച് പ്രദേശത്തെ ഡി.വൈ.എഫ്.ഐ പ്രവര്‍ത്തകര്‍ മണര്‍കാട് പള്ളിക്കു സമീപം ഇയാളുടെ കാര്‍ തടഞ്ഞു.
തുടര്‍ന്ന് ഇരുകൂട്ടരും തമ്മില്‍ വാക്കേറ്റമുണ്ടായി. ഇതില്‍ പ്രകോപിതനായ ബെന്നി കാറില്‍ സൂക്ഷിച്ചിരുന്ന തോക്കെടുത്തു കൊല്ലുമെന്ന് ഭീഷണിപ്പെടുത്തുകയായിരുന്നു.നിലത്തേക്ക് വെടിവെച്ച ശേഷം  ഇയാള്‍ രക്ഷപ്പെട്ടു. സംഭവത്തെ തുടര്‍ന്ന് ഡി.വൈ.എഫ്.ഐ പ്രവര്‍ത്തര്‍ പരാതിയുമായി മണര്‍കാട് പൊലിസ് സ്‌റ്റേഷനിലെത്തി. പ്രവര്‍ത്തകര്‍ നല്‍കിയ പരാതിയുടെ അടിസ്ഥാനത്തില്‍ അര്‍ധരാത്രിയോടെ ബെന്നിയെ പിടികൂടുകയായിരുന്നു. ബെന്നിയെ പിന്നീട് വൈദ്യപരിശോധനയ്ക്കു വിധേയമാക്കി. വാക്കേറ്റത്തിനിടെ തന്റെ സ്വര്‍ണമാല ഡി.വൈ.എഫ്.ഐ പ്രവര്‍ത്തകര്‍ പൊട്ടിച്ചെന്നു ബെന്നി പൊലിസില്‍ പരാതിപ്പെട്ടു. പ്രതിയെ ഇന്നലെ കോടതിയില്‍ ഹാജരാക്കി.