റിയാദ്: റിയാദിൽ നിന്നും കോഴിക്കോട്ടേക്ക് പുറപ്പെട്ട എയർ ഇന്ത്യാ വിമാനത്തിലെ മുഴുവൻ യാത്രക്കാർക്കും റിയാദ് കെ.എം.സി.സി സെൻട്രൽ കമ്മിറ്റി കോവിഡ് പ്രതിരോധ കിറ്റുകൾ വിതരണം ചെയ്തു.  ചൊവ്വാഴ്ച റിയാദിൽ നിന്നും കോഴിക്കോട്ടേക്ക് തിരിച്ച വിമാനത്തിലെ 152 യാത്രക്കാർക്കാണ്‌ റിയാദ് കെ.എം.സി.സി കിറ്റുകൾ വിതരണം ചെയ്തത്. ശരീരം മുഴുവൻ മറയുന്ന കവർ ഓൾ, മാസ്കുകൾ, രണ്ട് ജോഡി ഗ്രൗസുകൾ, സെൻട്രൽ കമ്മിറ്റിയുടെ പ്രത്യേക സാനിറ്റൈസർ എന്നിവയടങ്ങിയതായിരുന്നു സേഫ്റ്റി കിറ്റ്.

ചൊവ്വാഴ്ച രാവിലെ തന്നെ കെ.എം.സി.സി സഊദി നാഷണൽ കമ്മിറ്റി വർക്കിംഗ് പ്രസിഡണ്ട് അഷ് റഫ് വേങ്ങാട്ട്, സെൻട്രൽ കമ്മിറ്റി പ്രസിഡണ്ട് സി.പി.മുസ്തഫ, കമ്മിറ്റി ഭാരവാഹികളായ മുജീബ് ഉപ്പട, സിദ്ദീഖ് തുവ്വൂർ, നൗഷാദ് ചാക്കീരി, മുഹമ്മദ് കണ്ടകൈ, നസീർ മറ്റത്തൂർ, ഹുസൈൻ കൊപ്പം, മുനീർ മക്കാനി വനിതാ വിംഗ് ഭാരവാഹികളായ ജസീല മൂസ, ഷഹർബാൻ മുനീർ എന്നിവർ കിറ്റ് വിതരണത്തിനായി റിയാദ് അന്താരാഷ്ട്ര വിമാനത്താവള ത്തിലെത്തിയിരുന്നു. ആദ്യ വിമാനത്തിൽ യാത്ര തിരിച്ചവർക്കും സെൻട്രൽ കമ്മിറ്റി സേഫ്റ്റി കിറ്റ് വിതരണം ചെയ്തിരുന്നു. ചൊവ്വാഴ്ച വീണ്ടും ഇവർ കിറ്റുമായി എത്തിയത് ശ്രദ്ദയിൽപ്പെട്ട വിമാനത്താവള അധികൃതർ വിതരണത്തിനായി പ്രത്യേകം കൗണ്ടർ തന്നെ അനുവദിക്കുകയായിരുന്നു. എയർപ്പോർട്ട് മാനേജർ അഹമ്മദ് അൽ ഖഹ്താനിയും സഹ ഉദ്യോഗസ്ഥരും കൗണ്ടറിലെത്തി കെ.എം.സി.സിയുടെ പ്രവർത്തനത്തെ കുറിച്ച് ആരായുകയും വനിതാ വളണ്ടിയർമാരടക്കമുള്ളവരുടെ സാമൂഹ്യ പ്രതിബദ്ധതയെ അഭിനന്ദിക്കുകയും ചെയ്തു.

എയർ ഇന്ത്യാ ഡ്യൂട്ടി മാനേജർ സിറാജ് ഇവർക്ക് ആവശ്യമായ സഹകരണങ്ങൾ നൽകി. കെ.എം.സി.സിയുടെ പ്രവർത്തനത്തെ യാത്രക്കാർ അഭിനന്ദിക്കുകയും നന്ദി അറിയിക്കുകയും ചെയ്തു. ബുധനാഴ്ച കണ്ണൂരിലേക്ക് പുറപ്പെടുന്ന വിമാനത്തിലെ യാത്രക്കാർക്കും കിറ്റ് നൽകുമെന്ന് കമ്മിറ്റി ഭാരവാഹികൾ പറഞ്ഞു.