പൂനെ: സംസ്ഥാന സര്‍ക്കാര്‍ പ്ലാസ്റ്റിക്ക് നിരോധിച്ചപ്പോള്‍ ഭക്ഷണ സാധനങ്ങള്‍ പാഴ്‌സല്‍ നല്‍കാന്‍ പുതുവഴി കണ്ടെത്തി പൂനെയിലെ ഒരു ഹോട്ടല്‍.

പാഴ്‌സല്‍ ഭക്ഷണം സ്റ്റീല്‍ ബോക്‌സുകളില്‍ നല്‍കിയാണ് പ്ലാസ്റ്റിക്കിനെതിരേ ഹോട്ടല്‍ നിലപാടെടുത്തത്. ഉപയോഗ ശേഷം സ്റ്റീല്‍ ബോക്‌സുകള്‍ ഹോട്ടലില്‍ മടക്കിനല്‍കണം.

എന്നാല്‍ ദൂരയാത്ര ചെയ്യുന്നവര്‍ ബോക്‌സുകള്‍ക്ക് 200 രൂപ നല്‍കണം. ബോക്‌സ് തിരികെ എത്തിക്കുന്നത് എന്നായാലും അന്നു പണം മടക്കി നല്‍കും. പ്ലാസ്റ്റിക്കിനെതിരേയുള്ള പോരാട്ടം എന്നതിനപ്പുറം നിലനില്‍പ്പു കൂടിയാണ് ഹോട്ടലിനിത്.

പ്ലാസ്റ്റിക്ക് നിരോധിച്ചതുമൂലം നിരവധി ഹോട്ടലുകളാണ് സംസ്ഥാനത്ത് പ്രതിസന്ധി നേരിടുന്നത്. ഭക്ഷണം എത്തിച്ചിരുന്ന സോമാറ്റോ, സ്വിഗ്ഗി തുടങ്ങിയ ഓണ്‍ലൈന്‍ സ്‌റ്റോറുകളെല്ലാം പ്രവര്‍ത്തനം അവസാനിപ്പിച്ചു.

പ്ലാസ്റ്റിക്ക് നിരോധനം സര്‍ക്കാര്‍ പെട്ടെന്ന് അടിച്ചേല്‍പ്പിച്ചതില്‍ എതിര്‍പ്പുണ്ടെങ്കിലും പരിസ്ഥിതിയെ ഓര്‍ത്ത് തങ്ങള്‍ തീരുമാനത്തെ സ്വാഗതം ചെയ്യുന്നുവെന്ന് ഹോട്ടലുടമ ഗണേഷ് ഷെട്ടി പറയുന്നു.

കഴിഞ്ഞ മാര്‍ച്ച് 23നാണ് പ്ലാസ്റ്റിക്ക് ബാഗുകളുടേയും തെര്‍മോകോള്‍ ഉത്പന്നങ്ങളുടേയും ഉല്‍പാദനവും വിപണനവും നിരോധിച്ച് സര്‍ക്കാര്‍ ഉത്തരവിറക്കിയത്.