ന്യൂഡല്‍ഹി: ആം ആദ്മി പാര്‍ട്ടിയുടെ ഡല്‍ഹിയിലെ കോള്‍ സെന്ററുകളില്‍ പൊലിസ് റെയ്ഡ് നടത്തിയതിനെതിരേ പാര്‍ട്ടി നേതാക്കള്‍ തെരഞ്ഞെടുപ്പ് കമ്മിഷന്‍ ഓഫിസിന് മുന്‍പില്‍ ധര്‍ണ നടത്തി.
പാര്‍ട്ടി നേതാവും ഡല്‍ഹി ഉപമുഖ്യമന്ത്രിയുമായ മനിഷ് സിസോദിയയുടെ നേതൃത്വത്തിലാണ് പ്രവര്‍ത്തകര്‍ ധര്‍ണ നടത്തിയത്. ഡല്‍ഹി പൊലിസിനെതിരേ ആം ആദ്മിയുടെ പ്രത്യേക പ്രതിനിധി സംഘം മുഖ്യതെരഞ്ഞെടപ്പ് കമ്മിഷനര്‍ സുനില്‍ അറോറക്ക് പരാതി നല്‍കുകയും ചെയ്തു. ബി.ജെ.പിയുടെ നേതാക്കളില്‍ ചിലര്‍ ആം ആദ്മി പാര്‍ട്ടിയുടെ കോള്‍ സെന്ററുകളില്‍ എത്തി പ്രവര്‍ത്തകരെ ഭീഷണിപ്പെടുത്തിയതായും പരാതിയില്‍ പറഞ്ഞിട്ടുണ്ട്. അതേസമയം തെരഞ്ഞെടുപ്പ് പ്രചാരണത്തില്‍ കോള്‍സെന്ററുകള്‍ വഴി ആം ആദ്മി പാര്‍ട്ടി തെറ്റിദ്ധാരണ പരത്തുകയാണെന്ന് ബി.ജെ.പി ആരോപിച്ചു.