ജിദ്ദ : ജിദ്ദയില്‍ ശക്തമായ പൊടിക്കാറ്റ്. നാനൂറിലേറെ പേര്‍ ശ്വാസകോശ സംബന്ധമായ അസുഖങ്ങള്‍ക്ക് ചികിത്സ തേടി. ചൊവ്വാഴ്ച വൈകുന്നേരത്തോടെ പൊടിക്കാറ്റിന് ശമനമുണ്ടായെങ്കിലും ബുധനാഴ്ച വീണ്ടും ശക്തമാവുകയായിരുന്നു.

പൊടിക്കാറ്റിനെ തുടര്‍ന്ന് ജിദ്ദയില്‍ 422 പേര്‍ ചികില്‍സ തേടിയതായി മേഖല ആരോഗ്യകാര്യാലയം അറിയിച്ചു. 293 പേര്‍ മെഡിക്കല്‍ സെന്ററുകളിലും 129 പേര്‍ വിവിധ ആശുപത്രികളിലുമാണ് ചികില്‍സ തേടിയത്. പൊതുസ്ഥലത്തെ നിര്‍മാണ ജോലികളെയും കച്ചവടത്തെയും കപ്പലുകളുടെ നീക്കങ്ങളെയും കാറ്റ് ബാധിച്ചു.

പൊടിക്കാറ്റ് തുടരുമെന്ന കാലാവസ്ഥാ വകുപ്പിന്റെ മുന്നറിയിപ്പിനെ തുടര്‍ന്ന് മേഖലയിലെ മുഴുവന്‍ സ്‌കൂളുകള്‍ക്കും വിദ്യാഭ്യാസ മന്ത്രാലയം അവധി നല്‍കിയിരുന്നു. ജിദ്ദ ഇസ്ലാമിക് പോര്‍ട്ടിലെ ജോലികള്‍ നിര്‍ത്തിവെച്ചു. ദൂരക്കാഴ്ച കുറഞ്ഞതിനാലാണ് കപ്പല്‍ ഗതാഗതം നിര്‍ത്തിവെച്ചതെന്ന് തുറമുഖ മേധാവി ക്യാപ്റ്റന്‍ അബ്ദുല്ല ബിന്‍ അവാദ് പറഞ്ഞു.

ശക്തമായ കാറ്റിനെ തുടര്‍ന്ന് കിങ് അബുദുല്ല കോംപഌ്‌സിലെ വയര്‍ലസ് ടവര്‍ നിലംപൊത്തി. അപകടത്തില്‍ ആര്‍ക്കും പരുക്കില്ല. ടവര്‍ റിപ്പയര്‍ ചെയ്തു പുനഃസ്ഥാപിക്കുന്ന ജോലി ആരംഭിച്ചിട്ടുണ്ട്. മീന്‍പിടിക്കാനും ഉല്ലാസത്തിനും കടലില്‍ പോകുന്നവരോട് ആവശ്യമായ മുന്‍കരുതലെടുക്കാന്‍ കോസ്റ്റല്‍ ഗാര്‍ഡ്ആവശ്യപ്പെട്ടു. വ്യാഴാഴ്ച വരെ കാലാവസ്ഥാ വ്യതിയാനം തുടരുന്നതിനാല്‍ ആവശ്യമായ മുന്‍കരുതലെടുക്കണമെന്ന് സിവില്‍ ഡിഫന്‍സ് ജനങ്ങളോട് ആവശ്യപ്പെട്ടു.