താമരശേരി: കട്ടിപ്പാറ കരിഞ്ചോലമലയില്‍ ഉരുള്‍പൊട്ടലില്‍ 14 പേര്‍ മരിച്ച ദുരന്തത്തില്‍ ജീവന്‍ രക്ഷപ്പെട്ടവരുടെ ആശ്രിതര്‍ക്കും വീടുകള്‍ നഷ്ടപ്പെട്ടവര്‍ക്കും സഹായഹസ്തവുമായി കൈതപ്പൊയില്‍ എം.ഇ.എസ് സ്‌കൂള്‍ വിദ്യാര്‍ഥികള്‍.
ഏറെ നേരം ദുരന്തഭൂമിയില്‍ വിദ്യാര്‍ഥികള്‍ ചെലവഴിച്ചു. ഉരുള്‍പൊട്ടലിനെ കുറിച്ച് പഠനം നടത്തിവരുന്ന സി.ഡബ്ല്യു.ആര്‍.ഡി.എമ്മിലെ ടീം മാനേജര്‍ പ്രൊഫ. ഹമീദ് വിദ്യാര്‍ഥികളുമായി സംവദിച്ചു. ഭൂമിയെയും പര്‍വതങ്ങളെയും വ്യതിയാനമില്ലാതെ നിലനിര്‍ത്തിയെങ്കില്‍ മാത്രമേ ഇത്തരം ദുരന്തങ്ങള്‍ സംഭവിക്കാതിരിക്കുകയുള്ളുവെന്ന് അദ്ദേഹം പറഞ്ഞു. തങ്ങളുടെ നാട്ടില്‍ നടന്ന ഈ പ്രകൃതി ദുരന്തത്തില്‍ സര്‍വവും നഷ്ടപ്പെട്ടവര്‍ക്കുള്ള പുതുവസ്ത്രവും താല്‍ക്കാലികാശ്വാസത്തിനുള്ള സാമ്പത്തിക സഹായവും വാര്‍ഡ് മെംബര്‍ അസീസിന് എം.ഇ.എസ് ജില്ലാ പ്രസിഡന്റ് സി.ടി സക്കീര്‍ ഹുസൈന്‍ കൈമാറി. വീട് നഷ്ടപ്പെട്ടവര്‍ക്ക് സര്‍ക്കാരുമായി സഹകരിച്ച് എം.ഇ.എസ് ജില്ലാ കമ്മറ്റിയുടെ സഹായത്തോടെ നിര്‍മിക്കുന്ന വീടിന് വിദ്യാര്‍ഥികള്‍ സഹായ വാഗ്ദാനവും നല്‍കി. പ്രകൃതിയെ സംരക്ഷിക്കുമെന്ന് ദുരന്തഭൂമിയില്‍ വച്ച് വിദ്യാര്‍ഥികള്‍ പ്രതിജ്ഞയെടുത്തു.
സ്‌കൂള്‍ മാനേജര്‍ കെ.എം.ഡി മുഹമ്മദ് ചടങ്ങില്‍ അധ്യക്ഷനായി. കാട്ടിപ്പാറ ക്യാംപ് കോഡിനേറ്റര്‍ അബ്ദുല്‍ അസീസ്, സി.ടി സക്കീര്‍ ഹുസൈന്‍, എ.സി അബ്ദുല്‍ അസീസ്, അബൂബക്കര്‍ കൊടുവള്ളി, പി.എ അബ്ദുറഹ്മാന്‍, മനോജ് പി. മാത്യു, അനൂപ് താമരശ്ശേരി, റിയാസ് നൂറാംതോട്, വിപിനി, ഹഫ്‌സത്ത് സംസാരിച്ചു.