തിരൂരങ്ങാടി: കോളനി പരിസരത്ത് ആശുപത്രിയില്‍ നിന്നുള്ള മലിനജലം തള്ളുന്നതായി പരാതി. പന്താരങ്ങാടി കണ്ണാടിത്തടം പരിസരത്താണ് രാത്രിയുടെ മറവില്‍ മലിനജലം ഒഴുക്കുന്നതായി പരാതി ഉയര്‍ന്നത്.
 ദുര്‍ഗന്ധം പരന്നതോടെ നടത്തിയ അന്വേഷണത്തില്‍  ചെമ്മാട്ടുള്ള സ്വകാര്യ ആശുപത്രിയില്‍ നിന്ന് മലിനജലം തള്ളുന്നത് കണ്ടെത്തിയതെന്ന് നാട്ടുകാര്‍ പറഞ്ഞു. ഇതിനു മുമ്പും സമാന സംഭവം ഉണ്ടായെങ്കിലും നാട്ടുകാര്‍ വാഹനം തടഞ്ഞു താക്കീത് ചെയ്തിരുന്നുവത്രെ.
സംഭവം ആരോഗ്യവകുപ്പ് അധികൃതരെയും പൊലിസിനെയും വിവരം അറിയിക്കുകയും ചെയ്തിരുന്നു. വ്യാഴാഴ്ച രാവിലെ വീണ്ടും മാലിന്യം തള്ളുന്നത് ശ്രദ്ധയില്‍പ്പെട്ടതോടെ നാട്ടുകാര്‍ വാഹനം തടഞ്ഞു.
സംഭവം ശ്രദ്ധയില്‍പ്പെട്ടിട്ടുണ്ടെന്നും മലിനജലം തള്ളുന്നത് നിര്‍ത്താന്‍ ആശുപത്രി അധികൃതരോട് നിര്‍ദേശിച്ചതായും തിരൂരങ്ങാടി എസ്.ഐ.വിശ്വനാഥന്‍ കാരയില്‍ അറിയിച്ചു.
 മലിനജലം തള്ളുരുതെന്ന് നിര്‍ദേശിച്ചിട്ടുണ്ടെന്ന് നെടുവ പ്രാഥമികാരോഗ്യ കേന്ദ്രം അധികൃതരും അറിയിച്ചു.
ആശുപത്രിയില്‍ നിന്നുള്ള മലിനജലം ശുചീകരിച്ചതിന് ശേഷമാണ് തെങ്ങിന്‍തോപ്പ് നനയ്ക്കുന്നതിനായി കൊണ്ടുപോയതെന്ന്  ചെമ്മാട് ലൈലാസ് ആശുപത്രി എം.ഡി നസ്‌റുള്ള പ്രതികരിച്ചു.
സംഭവത്തില്‍ നടപടി ആവശ്യപ്പെട്ട് ജില്ലാ കലക്ടര്‍, ആരോഗ്യവകുപ്പ്, പൊലിസ് എന്നിവര്‍ക്ക് പരാതി നല്‍കാന്‍ പ്രദേശവാസികള്‍ തീരുമാനിച്ചു. എം.സി അയ്യപ്പന്‍, സി.പി നാരായണന്‍, കെ.പി രാജേഷ്, എം.കുട്ടന്‍, കെ.ടി സുഭാഷ്, സി. സിദ്ദീഖ്, നൗഫല്‍, വിനീഷ് പങ്കെടുത്തു.