നെടുമ്പാശേരി : പൊതുമാപ്പ് ലഭിച്ചതിനെ തുടര്‍ന്ന് കുവൈത്തിലെ വിവിധ ജയിലുകളില്‍ നിന്നും മോചിതരായ മലയാളികളുടെ ആദ്യ സംഘം നാട്ടില്‍ മടങ്ങിയെത്തി. കുവൈറ്റിന്റെ ദേശീയ വിമാന കമ്പനിയായ ജസീറ എയര്‍വെയ്‌സിന്റെ ജെ 9 1405 നമ്പര്‍ വിമാനം 150 മലയാളികളുമായി ഇന്നലെ രാത്രി 8.20 നാണ് നെടുമ്പാശേരി അന്താരാഷ്ട്ര വിമാനത്താവളത്തിലെത്തിയത്.
150 പേരുമായി ജസീറയുടെ മറ്റൊരു വിമാനം കൂടി ഇന്ന് നെടുമ്പാശേരിയിലെത്തും. വിവിധ കേസുകളില്‍പെട്ട് ജയിലില്‍ കഴിഞ്ഞിരുന്നവര്‍ക്ക് കൊറോണ വ്യാപനത്തിന്റെ പശ്ചാത്തലത്തില്‍ ഒരു മാസം മുന്‍പാണ് കുവൈറ്റ് സര്‍ക്കാര്‍ പൊതുമാപ്പ് പ്രഖ്യാപിച്ചത്.
എന്നാല്‍ ലോക് ഡൌണിനെ തുടര്‍ന്ന് വിമാന സര്‍വീസുകള്‍ നിര്‍ത്തി വച്ചതിനാല്‍ ഇവര്‍ക്ക് നാട്ടിലെത്താന്‍ കഴിഞ്ഞിരുന്നില്ല. 7000 ലധികം ഇന്ത്യക്കാരാണ് പൊതുമാപ്പിന് അര്‍ഹാരായിരുന്നത്. ഇതില്‍ ആയിരത്തിലധികം മലയാളികളുണ്ട്. ഇവര്‍ കുവൈറ്റ് സര്‍ക്കാരിന്റെ ഷെല്‍ട്ടറുകളില്‍ കഴിഞ്ഞുവരികയായിരുന്നു.
കുവൈറ്റ് സര്‍ക്കാര്‍ സൗജന്യ വിമാന ടിക്കറ്റ് നല്‍കിയാണ് ഇവരെ ഇന്ത്യയിലെത്തിക്കുന്നത്. ഇവരെ സൗജന്യമായി നാട്ടിലെത്തിക്കാന്‍ നേരത്തെ തന്നെ കുവൈറ്റ് സര്‍ക്കാര്‍ താല്‍പര്യം പ്രകടിപ്പിച്ചിരുന്നെങ്കിലും കുവൈറ്റില്‍ നിന്നുള്ള വിമാനങ്ങള്‍ക്ക് ഇന്ത്യയില്‍ ഇറങ്ങാന്‍ കേന്ദ്ര വ്യോമയാന മന്ത്രാലയം അനുമതി നിഷേധിച്ചത് വിവാദമായിരുന്നു. പിന്നീട് ഇരു രാജ്യങ്ങളുമായി നടന്ന ഉന്നതതല ചര്‍ച്ചയിലാണ് ഇക്കാര്യത്തില്‍ തീരുമാനമായത്. കഴിഞ്ഞ വ്യാഴാഴ്ച്ച മുതലാണ് പൊതുമാപ്പ് ലഭിച്ചവരുമായി വിമാനങ്ങള്‍ ഇന്ത്യയില്‍ എത്തിതുടങ്ങിയത്. ആന്ധ്രാപ്രദേശിലെ വിജയവാഡയിലെക്കായിരുന്നു ആദ്യ വിമാനം.