ഇരിട്ടി: ഇരിട്ടിയില്‍ വന്‍തീപിടുത്തം. ഇന്ന് പുലര്‍ച്ചെയുണ്ടായ തീപിടുത്തത്തില്‍ പവര്‍ ടൂള്‍സ് സാമഗ്രികള്‍ വില്‍പ്പന നടത്തുന്ന സ്ഥാപനം കത്തിനശിച്ചു. ഇരിട്ടി പുതിയ ബസ് സ്റ്റാന്റ് വണ്‍വേ റോഡില്‍ പഴയപാലം ജുമാ മസ്ജിദിനു മുന്‍വശം മാഞ്ഞു കോപ്ലക്‌സില്‍  പ്രവര്‍ത്തിക്കുന്ന ' ഐഡിയല്‍ ഇലക്ട്രോ ക്രാഫ്റ്റ് ' എന്ന സ്ഥാപനമാണ് കത്തി നശിച്ചത്. ഇരിട്ടിക്കടുത്ത് പടിയൂര്‍ പുലിക്കാട് സ്വദേശി സിനോജ് അഗസ്റ്റിന്‍ എന്നയാളുടെ ഉടമസ്ഥതയിലുള്ളതാണ് സ്ഥാപനം.

നൈറ്റ്  പട്രോളിംഗ് നടത്തുകയായിരുന്ന ഇരിട്ടി പൊലിസാണ് പുലര്‍ച്ചെ കടയില്‍ നിന്ന് തീയും പുകയും ഉയരുന്നത് കണ്ടത്. ഉടന്‍ ഇരിട്ടി ഫയര്‍ഫോഴ്‌സില്‍ വിവരമറിയിക്കുകയായിരുന്നു. അഗ്‌നിശമന സേന സ്റ്റേഷന്‍ മാസ്റ്റര്‍ ജോണ്‍സണ്‍ പീറ്ററിന്റെ നേതൃത്വത്തിലെത്തിയ ഫയര്‍ഫോഴ്‌സ് സംഘമാണ് തീയണച്ചു. ഷോര്‍ട്ട് സര്‍ക്യൂട്ടാണ് തീപിടുത്തത്തിന് കാരണമെന്നാണ് പ്രാഥമിക നിഗമനം

ലക്ഷങ്ങള്‍ വിലവരുന്ന മോട്ടോര്‍ ഉള്‍പ്പെടെ കടയിലും ഗോഡൗണിലും ഉണ്ടായിരുന്ന മുഴുവന്‍ പവര്‍ ടൂള്‍സുകളും പൂര്‍ണ്ണമായി കത്തി നശിച്ചു
25 ലക്ഷത്തോളം രൂപയുടെ നാശനഷ്ടം കണക്കാക്കുന്നു

മഴയായതിനാലും ഉചിത സമയത്ത് പൊലിസും ഫയര്‍ഫോഴ്‌സും ഉണര്‍ന്നു പ്രവര്‍ത്തിച്ചതിനാലുമാണ് വന്‍ ദുരന്തം ഒഴിവായത്