ലണ്ടൻ: ഫിഫ ലോകകപ്പ് സെമിഫൈനലിൽ ഇംഗ്ലണ്ടിനെതിരായ ജയത്തിന് പിന്നാലെ ഉയർന്നുവന്ന 'ഫോക്ക്‌ലാന്റ്സ് ബാനർ' വിവാദം യുകെയിൽ കളിക്കുന്ന അർജന്റീനിയൻ താരങ്ങൾക്ക് തിരിച്ചടിയാകുന്നു. രാഷ്ട്രീയ പ്രസ്താവന അടങ്ങിയ ബാനർ ഉയർത്തിയ സംഭവത്തിൽ മാഞ്ചസ്റ്റർ യുണൈറ്റഡിന്റെ ലിസാൻഡ്രോ മാർട്ടിനെസ്, ചെൽസിയുടെ എൻസോ ഫെർണാണ്ടസ്, ടോട്ടൻഹാമിന്റെ ക്രിസ്റ്റ്യൻ റൊമേറോ എന്നിവരുടെ യുകെ വർക്ക് വിസ റദ്ദാക്കപ്പെട്ടേക്കുമെന്നാണ് റിപ്പോർട്ടുകൾ.  

ലണ്ടൻ പത്രമായ 'എക്സ്പ്രസ് യുകെ' പുറത്തുവിട്ട റിപ്പോർട്ടുകൾ പ്രകാരം, വരാനിരിക്കുന്ന 2026-27 പ്രീമിയർ ലീഗ് സീസണിൽ ക്ലബ്ബുകളിലേക്ക് മടങ്ങിയെത്തുന്നതിന് ഈ നിയമനടപടികൾ തടസ്സമായേക്കും.

വിവാദം വച്ചുനീട്ടിയ ബാനർ 

ഇം​ഗ്ലണ്ടുമായുള്ള ലോകകപ്പ് സെമി മത്സരവിജയത്തിനു ശേഷം "ലാസ് മാൽവിനാസ് സൺ അർജന്റീനാസ്" (ഫോക്ക്‌ലാന്റ് ദ്വീപുകൾ അർജന്റീനയുടേതാണ്) എന്ന് രേഖപ്പെടുത്തിയ ബാനറാണ് കളിക്കാർ സ്റ്റേഡിയത്തിൽ പ്രദർശിപ്പിച്ചത്. ബ്രിട്ടീഷ് അധീനതയിലുള്ള ഫോക്ക്‌ലാന്റ് ദ്വീപുകളെച്ചൊല്ലി 1982-ൽ ഇരുരാജ്യങ്ങളും തമ്മിൽ നടന്ന ചരിത്രപരമായ യുദ്ധവും തർക്കങ്ങളും വീണ്ടും ഓർമ്മിപ്പിക്കുന്നതായിരുന്നു ഈ സംഭവം. 

കായികമേഖലയെ രാഷ്ട്രീയവുമായി കൂട്ടിക്കലർത്തിയ അർജന്റീനിയൻ താരങ്ങൾക്കെതിരെ ശക്തമായ നടപടിയെടുക്കണമെന്ന് ബ്രിട്ടീഷ് രാഷ്ട്രീയക്കാരും ആരാധകരും ഫിഫയോട് ആവശ്യപ്പെട്ടിട്ടുണ്ട്. വിഷയം ഫിഫ നിലവിൽ അന്വേഷിച്ചു വരികയാണെങ്കിലും ഇതുവരെ ഔദ്യോഗികമായി വിലക്കുകളോ ഉപരോധങ്ങളോ ഏർപ്പെടുത്തിയിട്ടില്ല.  

ശക്തമായ രാഷ്ട്രീയ പ്രത്യാഘാതം  

സംഭവത്തിൽ ബ്രിട്ടനിൽ കടുത്ത അമർഷമാണ് ഉയർന്നുവരുന്നത്. മുൻ ബ്രിട്ടീഷ് പ്രധാനമന്ത്രി മാർഗരറ്റ് താച്ചറുടെ സഹായിയായിരുന്ന നൈൽ ഗാർഡിനർ താരങ്ങൾക്കെതിരെ കർശന നടപടി വേണമെന്ന് ആവശ്യപ്പെട്ടു.

"ഈ ബ്രിട്ടൺ വിരുദ്ധ പ്രകടനത്തിൽ പങ്കാളികളായ പ്രീമിയർ ലീഗിലെ എല്ലാ അർജന്റീനിയൻ താരങ്ങളുടെയും യുകെ വർക്ക് വിസ റദ്ദാക്കണം. ഇത്തരം പ്രവൃത്തികളോട് യാതൊരു വിട്ടുവീഴ്ചയും പാടില്ല," എന്ന് അദ്ദേഹം പ്രസ്താവിച്ചു.  

താരങ്ങൾ ഔദ്യോഗികമായി മാപ്പ് പറയുന്നതുവരെ വിസ അനുവദിക്കരുതെന്ന് ഒരു വിഭാഗം യുകെ ആരാധകരും നിലപാടെടുത്തിട്ടുണ്ട്.  

നിയമ വിദഗ്ധരുടെ നിരീക്ഷണം  

അതേസമയം, പ്രകോപനപരമായ ബാനർ പ്രദർശിപ്പിച്ചതിന്റെ പേരിൽ മാത്രം പ്രീമിയർ ലീഗ് താരങ്ങളുടെ വിസ റദ്ദാക്കാൻ നിയമപരമായി എളുപ്പമല്ലെന്നാണ് ഇമിഗ്രേഷൻ വിദഗ്ധരുടെ വിലയിരുത്തൽ.  

കായിക രംഗത്തെ അച്ചടക്കലംഘനമായി ഫിഫയ്ക്ക് ഇതിനെ കാണാമെങ്കിലും, രാജ്യത്തിന്റെ വിസ നയങ്ങൾ അനുസരിച്ച് ഒരാളെ പുറത്താക്കാൻ തക്കതായ ശക്തമായ നിയമപരമായ കാരണങ്ങൾ ആവശ്യമാണ്. അതിനാൽ യുകെ ഗവൺമെന്റ് നേരിട്ട് വിസ റദ്ദാക്കുന്നതിലേക്ക് കടക്കുമോ എന്ന കാര്യത്തിൽ ഇപ്പോഴും അനിശ്ചിതത്വം നിലനിൽക്കുന്നുണ്ട്.