കാളികാവ്. മമ്പാട്ടുമൂല ഗവണ്‍മെന്റ് എല്‍. പി. സ്‌കൂളിന് പുതിയ കെട്ടിടം ഒരുങ്ങി. പ്രവാസികള്‍ വാങ്ങിച്ചു നല്‍കിയ സ്ഥലത്ത് പുതിയ കെട്ടിടത്തിനുള്ള തറക്കല്ലിടല്‍ കര്‍മം നടത്തി. മന്ത്രി എ പി അനില്‍കുമാറിന്റെ ആസ്ഥി വികസന ഫണ്ടില്‍ നിന്നും 25 ലക്ഷം രൂപയാണ് കെട്ടിട നിര്‍മാണത്തിന് അനുവദിച്ചിട്ടുള്ളത്.
ബഹ്‌റെയിന്‍ കെ എം സി സി ജില്ലാ സെക്രട്ടറി സലാം മമ്പാട്ടുമൂല മുന്‍ കയ്യെടുത്താണ് കെട്ടിട നിര്‍മാണത്തിനുള്ള സ്ഥലം വാങ്ങിച്ചത്. ഗ്രൗണ്ട് പോലുമില്ലാത്ത ഇടുങ്ങിയ സ്ഥലത്തെ പഴയ കെട്ടിടത്തിലാണ് സ്‌കൂള്‍ പ്രവര്‍ത്തിച്ചിരുന്നത്. സര്‍ക്കാര്‍ തലത്തില്‍ സ്ഥലം കണ്ടെത്തുന്നതിന് സംവിധാനമില്ലാത്തതിനാല്‍ കെ എം സി സി മുന്നിട്ടിറങ്ങുകയായിരുന്നു. പത്തു സെന്റ് സ്ഥലമാണ് പ്രവാസികളുടെ സഹായത്തില്‍ ലഭിച്ചത്.
കെട്ടിടത്തിന്റെ ശിലാസ്ഥാപനം മന്ത്രി എപി. അനില്‍ കുമാര്‍ നിര്‍വഹിച്ചു. ജില്ലാ പഞ്ചായത്ത് മെമ്പര്‍ പി ഖാലിദ് മാസ്റ്റര്‍ അധ്യക്ഷത വഹിച്ചു. ചോക്കാട് ഗ്രാമ പഞ്ചായത്ത് പ്രസിഡന്റ് പൈനാട്ടില്‍ അഷ്‌റഫ് , വിദ്യാഭ്യാസ സ്ഥിരം സമിതി അധ്യക്ഷന്‍ ടി എ സമീര്‍, ഗ്രാമ പഞ്ചായത്ത് മെമ്പര്‍ ഖദീജ, വി പി മുജീബ്, കെ എം സി സി ബഹ്‌റൈന്‍ കമ്മിറ്റി ജില്ലാ സെക്രട്ടറി സലാം മമ്പാട്ടുമൂല, എ ഇ ഒ. കെ ടി മോഹന്‍ദാസ്, ബി പി ഒ ആന്‍ഡ്രൂസ് മാത്യു, ടി സുരേഷ്‌കുമാര്‍ സംസാരിച്ചു.