കാസര്‍കോട്: കേരള കര്‍ണാടക അതിര്‍ത്തിയില്‍ ഉത്തരേന്ത്യന്‍ മോഡലില്‍ വിദ്യാര്‍ഥിയെ ആക്രമിച്ച സംഘ്പരിവാര്‍ സംഘത്തിലെ നാലുപേരെ പൊലിസ് അറസ്റ്റ് ചെയ്തു. ശബരിമല വിഷയത്തില്‍ നടന്ന ഹര്‍ത്താലില്‍ കാസര്‍കോട് ബായറില്‍ മദ്രസാ അധ്യാപകനെ ക്രൂരമായി മര്‍ദ്ദിച്ച കേസിലെ പ്രതിയാണ് വിദ്യാര്‍ഥിയെ മര്‍ദ്ദിച്ചത്.
ഗുരുതരമായി പരുക്കേറ്റ കരിം മൗലവി ആഴ്ചകളോളം തീവ്ര പരിചരണ വിഭാഗത്തില്‍ ചികിത്സയിലായിരുന്നു. മൂന്ന് മാസം ആശുപത്രിയില്‍ ചികിത്സ തേടിയെങ്കിലും ഇനിയും പൂര്‍ണമായും ഭേദമായിട്ടില്ല.

വിട്‌ളയില്‍ ഏപ്രില്‍ 21നായിരുന്നു ക്രൂരമായ അക്രമം നടന്നത്. വിദ്യാര്‍ഥിയെ ഒരുകൂട്ടം ആക്രമിക്കുകയും ജയ് ശ്രീറാം വിളിപ്പിക്കുകയായിരുന്നു. പൊലിസില്‍ പരാതി നല്‍കിയാല്‍ കൊന്നുകളയുമെന്ന് ഭീഷണിപ്പെടുത്തിയായിരുന്നു അക്രമം. ഈ ദൃശ്യങ്ങള്‍ പിന്നീട് വ്യാപകമായി പ്രചരിപ്പിക്കപ്പെട്ടു. സംഭവം വിവാദമായതോടെയാണ് നാലംഗ അക്രമി സംഘത്തെ കര്‍ണാടക പൊലിസ് വെള്ളിയാഴ്ച അറസ്റ്റ് ചെയ്തത്. കേരള കര്‍ണാടക അതിര്‍ത്തി പ്രദേശമായ കന്യാനയിലുള്ള ദിനേശ എന്ന സംഘ്പരിവാര്‍ പ്രവര്‍ത്തകനാണ് അക്രമത്തിന് നേതൃത്വം നല്‍കിയിരുന്നത്.