ശ്രീനഗര്‍: ജമ്മു കശ്മീരിലെ പുല്‍വാമ ജില്ലയില്‍ നടന്ന ഏറ്റുമുട്ടലില്‍ മൂന്നു തീവ്രവാദികളെ സൈന്യം വധിച്ചുവെന്ന് പൊലിസ് ഉദ്യോഗസ്ഥര്‍ അറിയിച്ചു. അതിനിടെ, സൈനികരും കല്ലേറുകാരും തമ്മിലുള്ള സംഘര്‍ഷത്തില്‍ 16 വയസ്സുകാരന്‍ കൊല്ലപ്പെടുകയും ചെയ്തു.

തീവ്രവാദികള്‍ ഉണ്ടെന്ന വിവരം ലഭിച്ചതിന്റെ അടിസ്ഥാനത്തില്‍ സൈന്യം ഥുംന ഗ്രാമത്തില്‍ തെരച്ചില്‍ നടത്തുകയായിരുന്നു.

ഒരു വീടിനുള്ളിലായിരുന്നു മൂന്നുപേരും. സൈന്യം വീട് വളഞ്ഞെങ്കിലും സാധാരണക്കാരും ഉള്ളതിനാല്‍ ഓപ്പറേഷന്‍ വൈകിയെന്ന് ഉദ്യോഗസ്ഥര്‍ പറഞ്ഞു.

സൈനികരും തീവ്രവാദികളും തമ്മില്‍ വെടിവയ്പ്പ് നടന്നുവെന്നും ശേഷം വീടിനുള്ളിലുണ്ടായിരുന്ന സാധാരണക്കാരെയെല്ലാം രക്ഷപ്പെടുത്തിയെന്നും ഉദ്യോഗസ്ഥര്‍ പറഞ്ഞു.

അതേസമയം, ഏറ്റുമുട്ടലില്‍ പങ്കെടുത്ത സൈനിക ഉദ്യോഗസ്ഥര്‍ക്കു നേരെ ഒരു കൂട്ടം ആളുകള്‍ കല്ലെറിയുകയും സംഘര്‍ഷം ഉണ്ടാവുകയും ചെയ്തു. ഇതേത്തുടര്‍ന്ന് സൈന്യം പ്രയോഗിച്ച പെല്ലെറ്റ് പ്രയോഗത്തില്‍ അഞ്ചു പേര്‍ക്ക് പരുക്കേറ്റു.

ഫൈസാന്‍ അഹമ്മദ് എന്ന 16 കാരനാണ് കൊല്ലപ്പെട്ടത്. സംഘര്‍ഷത്തില്‍ പരുക്കേറ്റ ഫൈസാനെ ആശുപത്രിയില്‍ എത്തിച്ചെങ്കിലും ഡോക്ടര്‍മാര്‍ മരണം അറിയിക്കുകയായിരുന്നു.