പെരിങ്ങത്തൂര്‍: പള്ളി ഇമാമിന്റെ വിശ്രമ മുറിയില്‍ മോഷണം. കഴിഞ്ഞ ദിവസം പുളിയനമ്പ്രം കീണാരി പള്ളിയിലാണ് മോഷണം നടന്നത്. മുറി കുത്തിതുറന്നനിലയിലാണ്. പ്രദേശത്ത് പള്ളികളില്‍ മോഷണം പതിവാകുമ്പോഴും പൊലീസ് ഇരുട്ടില്‍ തപ്പുകയാണ്. പള്ളിയുടെ ഗ്രില്‍സ് തുറന്നാണ് മോഷണം നടന്നത്. ഇവിടെ നിന്നും രണ്ടായിരം രൂപ കവര്‍ന്നു. മേക്കുന്ന് പറമ്പത്ത് പള്ളി, അണിയാരം പുല്ലാഞ്ഞോട്ട് പള്ളി എന്നിവിടങ്ങളില്‍ സമാന മോഷണം നടന്നിരുന്നു. കീണാരി പള്ളി സിക്രട്ടറി ചൊക്ലി പൊലീസില്‍ പരാതി നല്‍കി. ചൊക്ലി പ്രിന്‍സിപല്‍ എസ്.ഐ ഫായിസ് അലി, ചൊക്ലി ജനമൈത്രി എസ്.ഐ പ്രേംദാസ് പി. അസിസ്റ്റന്റ് എസ്.ഐ ജയപ്രകാശ് സംഭവ സ്ഥലത്തെത്തി പരിശോധന നടത്തിയിരുന്നു.