ഒറ്റപ്പാലം: വിദ്യാര്‍ഥിനികളോട് മോശമായി സംസാരിക്കുകയും വഴിയില്‍ ഇറക്കിവിടുകയും ചെയ്‌തെന്ന് പരാതിയില്‍ ഒറ്റപ്പാലം മോട്ടോര്‍ വാഹന വകുപ്പ് ഓഫിസ് ബസിന്റെ പെര്‍മിറ്റും, ജീവനക്കാരുടെയും ലൈസന്‍സും, റദ്ദാക്കാന്‍ തീരുമാനിച്ചു. ഒറ്റപ്പാലം മനിശ്ശേരി എ എംസി കോളജിലെ വിദ്യാര്‍ഥികള്‍ക്കാണ് ഒറ്റപ്പാലം തിരുവില്വാമല തൃശൂര്‍ റൂട്ടിലോടുന്ന മോജോ മോന്‍ എന്ന ബസ് ജീവനക്കാരുടെ ഭാഗത്തുനിന്നും മോശം അനുഭവമുണ്ടായത്. ഇതേത്തുടര്‍ന്ന് 5 വിദ്യാര്‍ഥിനികള്‍ ചേര്‍ന്ന് ഒറ്റപ്പാലം ആര്‍.ടി.ഒ ഓഫിസില്‍ പരാതി നല്‍കുകയായിരുന്നു.യാത്രാ ഇളവ് കാര്‍ഡ് ചോദിക്കുകയും കാര്‍ഡ് എടുക്കാന്‍ സാവകാശം കൊടുക്കാതെ മോശമായി സംസാരിക്കുകയും, മറ്റ് യാത്രക്കാരുടെ മുന്നില്‍ വെച്ചു കളിയാക്കുകയും ചെയ്ത് പാലപ്പുറത്ത് വെച്ച് ബസില്‍നിന്ന് തങ്ങളെ ഇറക്കിവിടുകയായിരുന്നെന്ന് വിദ്യാര്‍ഥിനികള്‍ പറഞ്ഞു.
പരാതിയുടെ അടിസ്ഥാനത്തില്‍ ഒറ്റപ്പാലം സബ് ആര്‍.ടി.ഒ അനൂപ് വര്‍ക്കിയുടെ നേതൃത്വത്തിലാണ് ബസ് ജീവനക്കാര്‍ക്കെതിരെ നടപടി സ്വീകരിച്ചത്.