കോതമംഗലം: മുനിസിപ്പല്‍ ആരോഗ്യ വിഭാഗം കോതമംഗലത്തെ ഹോട്ടലുകളില്‍ പരിശോധന നടത്തി. പഴകിയതും ഉപയോഗശൂന്യവുമായ നിരവധി ഭക്ഷണ പദാര്‍ഥങ്ങള്‍ പിടിച്ചെടുത്തു. ഏഴ് ഹോട്ടലുകള്‍ക്ക് നോട്ടീസ് നല്‍കി. കോതമംഗലം ടൗണിലും പരിസരത്തുമുള്ള ഒന്‍പത് ഹോട്ടലുകളിലാണ് മുനിസിപ്പല്‍ ആരോഗ്യ വിഭാഗം പരിശോധന നടത്തിയത്.
ഹോട്ടല്‍ നേഹ , കുത്തുകുഴിയിലെ ഹോട്ടല്‍ തലശേരി, ഹോട്ടല്‍ ബര്‍ക്കത്ത് , ഹോട്ടല്‍ അമ്മൂസ് , ഹോട്ടല്‍ ശ്രീ , ബസേലിയോസ് ആശുപത്രിയുടെ കാന്റീന്‍ എന്നിവിടങ്ങളില്‍ നിന്നാണ് പഴകിയ ഭക്ഷണ പദാര്‍ഥങ്ങള്‍ പിടിച്ചെടുത്തത്. പഴകിയ ഭക്ഷണത്തോടൊപ്പം വേവിക്കാത്ത മാംസവും മീനും ഒരുമിച്ച് ശീതീകരണികളില്‍ സൂക്ഷിക്കുന്ന ഹോട്ടലുകളും പരിശോധനയില്‍ കണ്ടെത്തിയിട്ടുണ്ട്. വൃത്തിഹീനമായാണ് ഒട്ടുമിക്ക ഫ്രീസറുകളും കാണപ്പെട്ടത്. ഭക്ഷണ പദാര്‍ഥങ്ങള്‍ ഉണ്ടാക്കാനുപയോഗിക്കുന്ന എണ്ണ കരി ഓയിലിനു സമാനമായാണ് കണ്ടെത്തിയത്. ദിവസങ്ങള്‍ പഴക്കമുള്ള ചോറും കറികളും പൊറോട്ടയും ചപ്പാത്തിയും പലഹാരങ്ങളും പിടിച്ചെടുത്തവയില്‍പ്പെടും.
പല ഹോട്ടലുകളുടെയും അടുക്കള വളരെ വൃത്തിഹീനമായിട്ടാണ് പരിശോധനക്കെത്തിയവര്‍ക്ക് കാണാന്‍ കഴിഞ്ഞത്. മഴക്കാലത്ത് ശുചിത്വമില്ലാതെ ഹോട്ടലുകള്‍ പ്രവര്‍ത്തിക്കുന്നത് പകര്‍ച്ചവ്യാധികള്‍ ഉള്‍പ്പെടെയുള്ള രോഗങ്ങള്‍ വ്യാപിക്കാന്‍ കാരണമാകും. ക്രമക്കേടുകള്‍ കണ്ടെത്തിയ ഹോട്ടലുകള്‍ക്കെതിരേ കര്‍ശന നിയമ നടപടികള്‍ സ്വീകരിക്കുമെന്ന് ആരോഗ്യ വകുപ്പ് അറിയിച്ചു.