തിരുവനന്തപുരം: ബി.ജെ.പിയിലേക്ക് പോകുന്ന ഐ.പി.എസ്, ഐ.എ.എസ് ഉദ്യോഗസ്ഥരുടെ ലക്ഷ്യം സ്ഥാനമാനങ്ങളെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍. ടി.പി സെന്‍കുമാര്‍ അടക്കമുള്ള ഉദ്യോഗസ്ഥര്‍ ബി.ജെ.പിക്ക് പിന്നാലെ പോകുന്നത് സംബന്ധിച്ചുള്ള ചോദ്യങ്ങള്‍ക്ക് സുപ്രഭാതത്തോട് പ്രതികരിക്കുകയായിരുന്നു കോടിയേരി.
കേന്ദ്ര ഭരണകര്‍ത്താക്കളോട് എല്ലാക്കാലത്തും ഐ.പി.എസ്, ഐ.എ.എസ് ഉദ്യോഗസ്ഥര്‍ക്ക് പ്രത്യേക ആഭിമുഖ്യം ഉണ്ടാകാറുണ്ട്. രാഷ്ട്രീയ ആഗ്രഹങ്ങളുള്ളവരും സ്ഥാനമാനങ്ങള്‍ ആഗ്രഹിക്കുന്നവരുമായ ഇത്തരം ആളുകള്‍ക്ക് ബി.ജെ.പി പലതും കൊടുത്തിട്ടുണ്ട്. 2004ലെ തെരഞ്ഞെടുപ്പിലും ഇതുപോലെ കുറേപ്പേര്‍ ഒ. രാജഗോപാലിനുവേണ്ടി രംഗത്തെത്തിയിരുന്നു. ഇപ്പോഴും അങ്ങനെ കുറേയാളുകള്‍ രംഗത്തെത്തിയിട്ടുണ്ട്. ഇതുപോലെയുള്ള ആളുകളെ കേന്ദ്ര ഭരണകക്ഷിക്ക് വേഗത്തില്‍ ആകര്‍ഷിക്കാന്‍ സാധിക്കുമെന്നും കോടിയേരി പറഞ്ഞു.