തിരുവനന്തപുരം: ബാങ്ക് ലയനം മറയാക്കി ഓണ്‍ലൈനിലൂടെ നടന്ന തട്ടിപ്പില്‍ തിരുവനന്തപുരം സ്വദേശിനിക്ക് പണം നഷ്ടമായി. പുതിയ എ.ടി.എം കാര്‍ഡ് നല്‍കാന്‍ ബാങ്കില്‍ നിന്ന് വിളിക്കുന്നുവെന്ന് പരിചയപ്പെടുത്തിയായിരുന്നു തട്ടിപ്പ്. ടെക്‌നോപാര്‍ക്കിലെ ജീവനക്കാരിയായ ഉള്ളൂര്‍ സ്വദേശിനിയാണ് കബളിപ്പിക്കപ്പെട്ടത്. സംഭവത്തില്‍ മെഡിക്കല്‍ കോളജ് പൊലിസ് അന്വേഷണം ആരംഭിച്ചിട്ടുണ്ട്.
ഇന്നലെ ഉച്ചക്ക് 12.30ഓടെയാണ് ടെക്‌നോപാര്‍ക്ക് ജീവനക്കാരി സിബിനയുടെ ഫോണിലേക്ക് സന്ദേശമെത്തുന്നത്. എസ്.ബി.ടി-എസ്.ബി.ഐയില്‍ ലയിച്ചതിനാല്‍ ഉപയോഗിച്ച് കൊണ്ടിരിക്കുന്ന എ.ടി.എം ഉടന്‍ ബ്ലോക്കാകുമെന്നും പുതിയ കാര്‍ഡ് നല്‍കുന്നതിനായി ഇപ്പോള്‍ ഉപയോഗിച്ചു കൊണ്ടിരിക്കുന്ന കാര്‍ഡിന്റെ വിശദാംശങ്ങള്‍ നല്‍കണമെന്നും ആവശ്യപ്പെട്ടു. എസ്.ബി.ഐയുടെ മുംബൈ ഓഫിസില്‍ നിന്നാണ് എന്നു പരിചയപ്പെടുത്തിയായിരുന്നു തട്ടിപ്പ്.
കാര്‍ഡ് നമ്പര്‍ പറഞ്ഞ് കൊടുത്തതിന് പിന്നാലെ രണ്ടു തവണകളിലായി 20,000 രൂപ അക്കൗണ്ടില്‍ നിന്ന് പിന്‍വലിക്കപ്പെട്ടു. തുടര്‍ന്ന് തട്ടിപ്പാണെന്ന് ബോധ്യപ്പെട്ടതോടെ സിബിന അക്കൗണ്ടില്‍ ബാക്കിയുണ്ടായിരുന്ന പണം നെറ്റ് ബാങ്കിങ് വഴി മറ്റൊരു അക്കൗണ്ടിലേക്ക് മാറ്റുകയായിരുന്നു. അതേസമയം, ഇത്തരം കോളുകള്‍ക്കെതിരേ ജാഗ്രത പാലിക്കണമെന്ന് നേരത്തെ നിര്‍ദേശം നല്‍കിയിരുന്നുവെന്ന് എസ്.ബി.ഐ വ്യക്തമാക്കി.