കൊല്‍ക്കത്ത: ബംഗാളില്‍ അടുത്ത വര്‍ഷം നിയമസഭാ തെരഞ്ഞെടുപ്പ് നടക്കാനിരിക്കെ തൃണമൂല്‍ കോണ്‍ഗ്രസിനെയും മുഖ്യമന്ത്രി മമതാ ബാനര്‍ജിയേയും വെല്ലുവിളിച്ച് കേന്ദ്ര ആഭ്യന്തര മന്ത്രി അമിത് ഷാ.
ബംഗാളില്‍ അടുത്ത വര്‍ഷം നടക്കുന്ന നിയമസഭാ തെരഞ്ഞെടുപ്പില്‍ വലിയ ഭൂരിപക്ഷത്തോടെ ബി.ജെ.പി അധികാരത്തിലെത്തുമെന്നാണ് അമിത് ഷാ അവകാശപ്പെടുന്നത്. ഒരു ദേശീയ മാധ്യമത്തിന് നല്‍കിയ അഭിമുഖത്തിലായിരുന്നു അമിത് ഷായുടെ പരാമര്‍ശം.
ബംഗാളില്‍ ബി.ജെ.പി അധികാരത്തില്‍ വരണമെന്നാണ് മമതയുടെ ആഗ്രഹമെങ്കില്‍ അതു നടക്കുമെന്നായിരുന്നു അമിത് ഷാ പറഞ്ഞത്.
ബംഗാളിലെ ജനങ്ങള്‍ മാറ്റം ആഗ്രഹിക്കുന്നുണ്ടെന്നും മമതയുടെ സര്‍ക്കാര്‍ പരാജയമാണന്നും പറഞ്ഞ അദ്ദേഹം, മമതയ്‌ക്കെതിരേ രൂക്ഷമായി പ്രതികരിക്കുകയും ചെയ്തു.
നേരത്തെ, പെട്ടെന്ന് ലോക്ക്ഡൗണ്‍ പ്രഖ്യാപിച്ചത് കാരണമാണ് തൊഴിലാളികള്‍ കുടുങ്ങിയതെന്നും കൊവിഡ് വ്യാപന സമയത്തും ബി.ജെ.പി സര്‍ക്കാര്‍ രാഷ്ട്രീയം കളിക്കുകയാണെന്നും ആരോപിച്ച് മമത രംഗത്തെത്തിയിരുന്നു.
ബംഗാളില്‍ കൊവിഡ് വ്യാപനം ശക്തമാണെന്ന് പറഞ്ഞ അവര്‍, ഇതു വര്‍ധിപ്പിക്കാനേ കേന്ദ്ര നയങ്ങള്‍കൊണ്ട് സാധിക്കൂവെന്നും കുറ്റപ്പെടുത്തിയിരുന്നു.
ഇതിനുള്ള മറുപടിയിലാണ് താന്‍ എം.പിയാണെന്നും ബംഗാളില്‍ ബി.ജെ.പി അധികാരത്തിലെത്തുന്നതാണ് മമതയുടെ താല്‍പര്യമെങ്കില്‍ അത് അടുത്ത തെരഞ്ഞെടുപ്പില്‍ സംഭവിക്കുമെന്നും അമിത് ഷാ പറഞ്ഞത്.