കൊച്ചി: ആല്‍ഫാ പാലിയേറ്റീവ് കെയറിന്റെ കീഴില്‍ പാടിവട്ടം സംഗമനം ലെയിനില്‍ ആരംഭിക്കുന്ന സിറ്റി ലിങ്ക് സെന്ററിന്റെ ഉദ്ഘാടനം 14ന് രാവിലെ പത്തിന് ആല്‍ഫാ പാലിയേറ്റീവ് ട്രസ്റ്റ് രക്ഷാധികാരി ഇന്നസെന്റ് എംപി സെന്റര്‍ ഉദ്ഘാടനം ചെയ്യും.
പ്രൊഫ. കെ.വി. തോമസ് എംപി, തൃക്കാക്കര നഗരസഭ ചെയര്‍പേഴ്‌സണ്‍ കെ.കെ. നീനു, സിപിഎം ജില്ലാ സെക്രട്ടറി പി.രാജീവ്, ജില്ലാ കലക്റ്റര്‍ രാജമാണിക്യം ഐഎഎസ്, സിറ്റി പൊലീസ് കമ്മിഷണര്‍ എം.പി. ദിനേശ് ഐപിഎസ്, കൗണ്‍സിലര്‍മാരായ സി.ഡി. വത്സലകുമാരി, എം.ബി. മുരളീധരന്‍, അഡ്വ. പി.എം. നസീമ എന്നിവര്‍ പങ്കെടുക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. മരണം കച്ചവടത്തിനുള്ള ഉപാധിയായി കാണുന്ന സാഹചര്യം അവസാനിപ്പിച്ച് ആരോഗ്യ പരിപാലനം ലക്ഷ്യംവച്ചുള്ള പ്രവര്‍ത്തനങ്ങളാണ് ആല്‍ഫാ നടത്തുന്നത്. ആരോഗ്യ പരിപാലനത്തില്‍ സര്‍ക്കാര്‍ സംവിധാനങ്ങളുടെ പോരായ്മ അപകടകരമായ അവസ്ഥയാണ് ചൂണ്ടിക്കാണിക്കുന്നത്.
ഈ അവസ്ഥയ്ക്ക് മാറ്റമുണ്ടാക്കുക എന്ന ലക്ഷ്യത്തോടെ നാല് ജില്ലകളിലായി നാല് ഹോസ്പീസുകളും 20ല്‍ താഴെ ലിങ്ക് സെന്ററുകളും പ്രവര്‍ത്തിക്കുന്നുണ്ടെന്നും പറഞ്ഞു. വാര്‍ത്താസമ്മേളനത്തില്‍ ആല്‍ഫാ പാലിയേറ്റീവ് കെയര്‍ പ്രസിഡന്റ് വി.എന്‍. പുരുഷോത്തമന്‍, സെക്രട്ടറി സലീന മോഹന്‍, ജോയിന്റ് സെക്രട്ടറി കെ.യു. ബാവ, കമ്മിറ്റിയംഗങ്ങളായ ടി.ജെ. കുര്യന്‍, തോമസ് എന്നിവര്‍ പങ്കെടുത്തു.