പൊന്നാനി: കടലിലും കനത്ത ചൂടായതോടെ മത്സ്യബന്ധനം പ്രതികൂലാവസ്ഥയില്‍. പൊന്നാനി തീരത്തു കഴിഞ്ഞ ദിവസങ്ങളിലെ ചൂട് 38 ഡിഗ്രി ആയിരുന്നുവെങ്കില്‍ ആഴക്കടലില്‍ ചൂട് 40 ഡിഗ്രിക്കു മുകളിലാണ്.
കടലില്‍ കനത്ത ചൂട് അനുഭവപ്പെടുന്നതിനാല്‍ മത്സ്യബന്ധനം പ്രതികൂലാവസ്ഥയിലാണെന്നു മത്സ്യത്തൊഴിലാളികള്‍ പറഞ്ഞു. കടലിന്റെ അടിത്തട്ടിലെ ചൂട് മത്സ്യങ്ങള്‍ കൂട്ടത്തോടെ തീരംവിടാന്‍ കാരണമായിട്ടുണ്ട്. ആഴക്കടലില്‍ നങ്കൂരമിട്ടുള്ള മത്സ്യബന്ധനം സാധ്യമാകാത്ത അവസ്ഥയാണെന്നു തൊഴിലാളികള്‍ പറയുന്നു. ദിവസംതോറും മത്സ്യബന്ധനം നടത്തി തിരിച്ചുവരികയെന്നതു പ്രായോഗികമല്ലാത്തതിനാല്‍ കടുത്ത ചൂട് മത്സ്യത്തൊഴിലാളികളെ ദുരിതത്തിലാക്കിയിട്ടുണ്ട്.
മിക്ക ബോട്ടുകളും കടലില്‍ പോകാതായിട്ടുണ്ട്. പൊന്നാനിയില്‍നിന്നു കയറ്റുമതി ചെയ്യുന്ന മത്സ്യങ്ങളില്‍ 30 ശതമാനത്തിന്റെ കുറവാണ് രേഖപ്പെടുത്തിയിട്ടുള്ളത്.
മാസങ്ങളായി മതിയായ മത്സ്യം കിട്ടാത്തതിനാല്‍ മത്സ്യത്തൊഴിലാളികള്‍ ദുരിതത്തിലായിരുന്നു. അതിനിടയിലാണ് കടലിലെ കനത്തചൂടുകാരണം കിട്ടിക്കൊണ്ടിരിക്കുന്ന മത്സ്യവും കിട്ടാതായത്.
ചൂടുകാരണം പൊന്നാനി കോള്‍ മേഖലയിലുള്‍പ്പെടെ മുഴുവന്‍ കൃഷിയിടങ്ങളിലും വിളഞ്ഞുനിന്ന നെല്ലുകള്‍ കരിഞ്ഞുണങ്ങിയ നിലയിലാണ്. ഭാരതപ്പുഴയിലെ നീരൊഴുക്കു കുറഞ്ഞതോടെ  ഇടത്തോട് വറ്റിത്തുടങ്ങി. ചമ്രവട്ടം ജലസംഭരണിയുടെ ഭാഗം ചരിത്രത്തിലില്ലാത്ത വിധം വെള്ളം വറ്റി പുല്ലുകള്‍ ഉയര്‍ന്നുപൊങ്ങിയ നിലയിലാണ്. കൃഷിയിടങ്ങളിലേക്കു വെള്ളമെത്തുന്ന ബിയ്യം റഗുലേറ്ററിന്റെ ഭാഗങ്ങളിലും ജലനിരപ്പ് കുത്തനെ താഴ്ന്നിട്ടുണ്ട്. തീരപ്രദേശത്തെ കിണറുകളില്‍ ഉപ്പുവെള്ളത്തിന്റെ തോത് വര്‍ധിച്ചിരിക്കുകയുമാണ്.