കൂത്താട്ടുകുളം: ജില്ല ലൈബ്രറി കൗണ്‍സില്‍ ഏര്‍പ്പെടുത്തിയ നെല്‍കൃഷി പുരസ്‌കാരം തിരുമാറാടി പഞ്ചായത്തിലെ കാക്കൂര്‍ ഗ്രാമീണ വായനശാലക്ക് ലഭിച്ചു. പതിനായിരം രൂപയും പ്രശംസാ പത്രവുമാണ് പുരസ്‌കാരമായി ലഭിച്ചത്.
കാക്കൂര്‍ കള്ളാട്ടുകുഴിപാടശേഖരത്തില്‍ നിലം പാട്ടത്തിനെടുത്താണ് വായനശാല നേതൃത്വത്തില്‍ നെല്‍കൃഷി നടത്തിയത്. വായനശാലക്കു സമീപം നടത്തിയ ജൈവ പച്ചക്കറി കൃഷിയും വിജയമായിരുന്നു. വായനശാലകളുടെ നേതൃത്വത്തില്‍ നാട് കാര്‍ഷിക സംസ്‌കാരത്തിലേക്ക് തിരികെ പോകണം എന്ന ലക്ഷ്യത്തോടെയാണ് ജില്ല ലൈബ്രറി കൗണ്‍സില്‍ പുരസ്‌കാരം ഏര്‍പ്പെടുത്തിയത്. കാക്കൂരില്‍ നടന്ന ചടങ്ങില്‍ താലൂക്ക് സെക്രട്ടറി ജോസ് കരിമ്പനയില്‍ നിന്നും  ലൈബ്രറി പ്രസിഡന്റ് കെ.പി അനീഷ് കുമാര്‍,സെക്രട്ടറി വര്‍ഗീസ് മാണി, താലൂക്ക് ലൈബ്രറി കൗണ്‍സില്‍ അംഗങ്ങളായ വി കെ ശശിധരന്‍, സുനില്‍ കള്ളാട്ടുകുഴി, വായനശാല  വൈസ് പ്രസിഡന്റ് ഹരീഷ് ആര്‍ നമ്പൂതിരിപ്പാട്, എന്നിവര്‍ ചേര്‍ന്ന് പുരസ്‌കാരം ഏറ്റുവാങ്ങി. കെ.പി അനീഷ് കുമാര്‍ അധ്യക്ഷനായി. എസ് സതീഷ് കുമാര്‍, പി.കെ പ്രസാദ് ,എം എന്‍ മനോജ് കുമാര്‍, ബീന ജോസ്, സ്മിത ബൈജു എന്നിവര്‍ സംസാരിച്ചു.