രാജ്‌കോട്ട്: ഗുജറാത്ത് ലയണ്‍സിനെ 21 റണ്‍സിന് കീഴടക്കി റോയല്‍ ചലഞ്ചേഴ്‌സ് ബാംഗ്ലൂര്‍ ഐ.പി.എല്ലിലെ രണ്ടാം വിജയം സ്വന്തമാക്കി. ആദ്യം ബാറ്റ് ചെയ്ത ബാംഗ്ലൂര്‍ 20 ഓവറില്‍ രണ്ട് വിക്കറ്റ് നഷ്ടത്തില്‍ 213 റണ്‍സെടുത്ത് ഈ ഐ.പി.എല്ലിലെ മികച്ച ടോട്ടല്‍ പടുത്തുയര്‍ത്തി. കൂറ്റന്‍ വിജയ ലക്ഷ്യത്തിലേക്ക് ബാറ്റേന്തിയ ഗുജറാത്ത് 20 ഓവറില്‍ ഏഴ് വിക്കറ്റ് നഷ്ടത്തില്‍ 192 റണ്‍സില്‍ പൊരുതി വീണു. 44 പന്തില്‍ ഏഴ് സിക്‌സും രണ്ട് ഫോറും സഹിതം 72 റണ്‍സ് വാരി ബ്രെണ്ടന്‍ മെക്കല്ലം മികച്ചു നിന്നു. വാലറ്റത്ത് ഇഷാന്‍ കിഷന്‍ 16 പന്തില്‍ നാല് സിക്‌സടക്കം 39 റണ്‍സെടുത്തെങ്കിലും അനിവാര്യ പരാജയം തടുക്കാനായില്ല. ബാംഗ്ലൂരിനായി യുസവേന്ദ്ര ചഹല്‍ മൂന്ന് വിക്കറ്റുകള്‍ വീഴ്ത്തി. 

നേരത്തെ മിന്നലായി ബാറ്റേന്തി ക്രിസ് ഗെയില്‍ തന്റെ നിശ്ബ്ദത വെടിഞ്ഞതോടെയാണ് റോയല്‍ ചലഞ്ചേഴ്‌സ് ബാംഗ്ലൂര്‍ കൂറ്റന്‍ സ്‌കോറിലെത്തിയത്. വാളടെത്തുവരെല്ലാം വെളിച്ചപ്പാടെന്നു പറഞ്ഞതു പോലെ ബാംഗ്ലൂരിനായി ബാറ്റേന്തിയവരെല്ലാം ആഞ്ഞടിച്ചതോടെ ഗുജറാത്തിന്റെ ബൗളര്‍മാര്‍ ഹതാശരായി. നിര്‍ണായക സമയത്ത് ക്രിസ് ഗെയിലിനെ മികച്ച ബൗളിങില്‍ വിക്കറ്റിന് മുന്നില്‍ കുടുക്കിയ മലയാളി ബൗളര്‍ ബേസില്‍ തമ്പി മാത്രം കൂട്ടത്തില്‍ വേറിട്ട് നിന്നു. നാലോവറില്‍ ബേസില്‍ വഴങ്ങിയത് 31 റണ്‍സ്. മറ്റെല്ലാവര്‍ക്കും കാര്യമായി തന്നെ തല്ലു കൊണ്ടു.
ഒന്നാം വിക്കറ്റില്‍ ക്രിസ് ഗെയ്‌ലും നായകന്‍ വിരാട് കോഹ്‌ലിയും ചേര്‍ന്ന് 12.4 ഓവറില്‍ വാരിയത് 122 റണ്‍സ്. ഗെയ്ല്‍ തന്റെ മാരക ഫോം വീണ്ടെടുത്തപ്പോള്‍ 38 പന്തില്‍ പിറന്നത് 77 റണ്‍സ്. ഏഴു സിക്‌സും അഞ്ചു ഫോറും ഗെയ്ല്‍ അടിച്ചെടുത്തു. കോഹ്‌ലി 50 പന്തില്‍ ഏഴു ഫോറും ഒരു സിക്‌സും സഹിതം 64 റണ്‍സ് കണ്ടെത്തി. പിന്നാലെയെത്തിയ ട്രാവിസ് ഹെഡ്ഡ് പുറത്താകാതെ 16 പന്തില്‍ 30 റണ്‍സെടുത്തപ്പോള്‍ ഇത്രയും പന്തില്‍ 38 റണ്‍സെടുത്ത് പുറത്താകാതെ നിന്ന് കേദാര്‍ ജാദവും മികച്ച സംഭാവന നല്‍കി.