രാജ്‌കോട്ട്: ഒടുവില്‍ ഇടവേളയ്ക്ക് വിരാമമിട്ട് ക്രിസ്റ്റഫര്‍ ഹെന്റി ഗെയ്ല്‍ എന്ന കരീബിയന്‍ അതികായന്റെ ബാറ്റ് വീണ്ടും മിന്നലുകള്‍ തീര്‍ത്തു. രാജ്‌കോട്ടിലെ ക്രിക്കറ്റ് പിച്ചില്‍ ഗെയിലിന്റെ ബാറ്റ് തീക്കാറ്റായി പടര്‍ന്നപ്പോള്‍ 38 പന്തില്‍ പിറന്നത് 77 റണ്‍സ്. ഏഴ് കൂറ്റന്‍ സിക്‌സറുകളും അഞ്ചു ഫോറുകളും ആ ബാറ്റില്‍ നിന്ന് പെയ്തു. ഒപ്പം ഒരപൂര്‍വ റെക്കോര്‍ഡും ഗെയില്‍ സ്വന്തമാക്കി. ടി20 ക്രിക്കറ്റിന്റെ ചരിത്രത്തില്‍ 10000 റണ്‍സ് പിന്നിടുന്ന ലോകത്തിലെ ആദ്യ ബാറ്റ്‌സ്മാന്‍ എന്ന പെരുമ.
ഇന്ത്യന്‍ പ്രീമിയര്‍ ലീഗ് പോരാട്ടത്തില്‍ ഗുജറാത്ത് ലയണ്‍സിനെതിരേ ബാറ്റ് ചെയ്താണ് ഗെയ്ല്‍ റെക്കോര്‍ഡ് സ്വന്തമാക്കിയത്. ഗുജറാത്തിനെതിരേ കളിക്കാനിറങ്ങുമ്പോള്‍ ഗെയിലിന്റെ അക്കൗണ്ടില്‍ 9997 റണ്‍സായിരുന്നു. മൂന്ന് റണ്‍സ് ചേര്‍ത്ത് റെക്കോര്‍ഡിട്ട ഗെയ്ല്‍ അവിടം കൊണ്ടവസാനിപ്പിച്ചില്ല. പിന്നീട് മലപ്പടക്കത്തിന് തിരികൊളുത്തിയത് പോലെ പന്ത് നാലുപാടും പായിച്ച് വിന്‍ഡീസ് അതികായന്‍ തന്റെ ഫോമിന്റെ അപാരത പ്രദര്‍ശിപ്പിച്ചപ്പോള്‍ ഗുജറാത്തിന്റെ എല്ലാ ബൗളര്‍മാരും അടികൊണ്ടു വലഞ്ഞു.

തന്റെ 290ാം മത്സരത്തില്‍ 285ാം ഇന്നിങ്‌സിലാണ് അനുപമമായ നേട്ടം ഗെയ്ല്‍ സ്വന്തമാക്കിയത്. 18 ശതകങ്ങളും 61 അര്‍ധ ശതകങ്ങളും 743 സിക്‌സറുകളും 769 ഫോറുകളുമടങ്ങുന്നതാണ് ഗെയിലിന്റെ 10074 റണ്‍സ്. 37 തവണ പുറത്താകാതെ നിന്ന ഗെയിലിന്റെ ഏറ്റവും മികച്ച ഇന്നിങ്‌സ് ഐ.പി.എല്ലില്‍ പൂനെ വാരിയേഴ്‌സിനെതിരേ അടിച്ചെടുത്ത 66 പന്തില്‍ 175 റണ്‍സെന്ന സ്‌കോറാണ്. ടി20യില്‍ ഒരു ബാറ്റ്‌സ്മാന്‍ നേടുന്ന ഏറ്റവും മികച്ച വ്യക്തിഗത സ്‌കോറും ഇതു തന്നെ. തീര്‍ന്നില്ല ഏറ്റവും കൂടുതല്‍ സെഞ്ച്വറികളും അര്‍ധ സെഞ്ച്വറികളും കുറിച്ചതിന്റെ റെക്കോര്‍ഡും ഗെയിലില്‍ ഭദ്രം. 10000 പിന്നിട്ട റെക്കോര്‍ഡ് സമീപ കാലത്തൊന്നും ഒരു ബാറ്റ്‌സ്മാന് മറികടക്കാന്‍ സാധിക്കുമെന്ന് തോന്നുന്നില്ല. രണ്ടാം സ്ഥാനത്തുള്ള ബ്രണ്ടന്‍ മെക്കല്ലത്തിന്റെ സമ്പാദ്യം (7524)റണ്‍സാണ്. ബ്രാഡ് ഹോഡ്ജ് (7338), ഡേവിഡ് വാര്‍ണര്‍ (7156), കൈറോണ്‍ പൊള്ളാര്‍ഡ് (7087) എന്നിങ്ങനെയാണ് പിന്നാലെയുള്ളവരുടെ നേട്ടം.
അന്താരാഷ്ട്ര ടി20യില്‍ വെസ്റ്റിന്‍ഡീസിനായി 50 മത്സരങ്ങള്‍ കളിച്ച ഗെയ്ല്‍ 1519 റണ്‍സാണ് നേടിയത്. ഇതില്‍ രണ്ട് സെഞ്ച്വറികളും 13 അര്‍ധ സെഞ്ച്വറികളും ഉള്‍പ്പെടുന്നു. 117 റണ്‍സാണ് മികച്ച സ്‌കോര്‍.