അരൂര്‍: ദേശീയപാതയില്‍ ചന്തിരൂര്‍ പാലത്തിന് വടക്കുഭാഗത്തുള്ള മീഡിയന്‍ ഗ്യാപ്പ് അടച്ചതിനെതിരെ പ്രതിഷേധം ശക്തമാകുന്നു. അടച്ച മീഡിയന്‍ ഗ്യാപ്പ് ഉടന്‍തന്നെ തുറന്നുകൊടുക്കണമെന്ന് ആവശ്യപ്പെട്ട് ചന്തിരൂര്‍ മര്‍ച്ചന്റ്‌സ് യൂണിയന്റെ നേതൃത്വത്തില്‍ വിവിധ സംഘടനകളുമായി ചേര്‍ന്ന് ആക്ഷന്‍ കൗണ്‍സില്‍ രൂപീകരിച്ചു. ആക്ഷന്‍ കൗണ്‍സിലില്‍ പഞ്ചായത്തംഗങ്ങളും, ആട്ടോറിക്ഷ തൊഴിലാളികളും അടക്കമുള്ളവര്‍ പങ്കെടുത്തു.
കഴിഞ്ഞമാസം ഈ മീഡിന്‍ ഗ്യാപ്പിലുണ്ടായ അപകടത്തില്‍ രണ്ടു പേര്‍ മരിച്ചതിനെതുടര്‍ന്നാണ് പോലീസ് മീഡിയന്‍ ഗ്യാപ്പ് അടച്ചത്. ശക്തമായ പ്രതിഷേധത്തെ തുടര്‍ന്ന് പോലീസ് പിന്നീട് തുറന്നു കൊടുക്കാമെന്ന് സമ്മതിച്ചിരുന്നെങ്കിലും ഇതുവരേയും തുറന്നു നല്‍കാത്തതോടെയാണ് സമരം നടത്തുവാന്‍ ആക്ഷന്‍ കൗണ്‍സില്‍ തീരുമാനിച്ചത്.
അടച്ച മീഡിയന്‍ ഗ്യാപ്പ് തുറന്നു നല്‍കുന്നതിന് ആവശ്യമായ നടപടികള്‍ സ്വീകരിക്കണമെന്ന് ആവശ്യപ്പെട്ട് അരൂര്‍ പഞ്ചായത്തിനെ സമീപിച്ചിരുന്നു. ഇതിനെ തുടര്‍ന്ന് സഞ്ചാര സ്വാതന്ത്യം തടസപ്പെടുത്തരുതെന്നും അടിയന്തിര സന്ദര്‍ഭങ്ങളില്‍ അടച്ച മീഡിയന്‍ ഗ്യാപ്പ് തുറന്നുകൊടുക്കണമെന്ന് പോലീസിന് പഞ്ചായത്ത് നിര്‍ദ്ദേശം നല്‍കുകയും ചെയ്തിരുന്നു. ആലപ്പുഴ ഡിവൈ.എസ്.പിയും കുത്തിയതോട് സര്‍ക്കിള്‍ ഇന്‍സ്‌പെക്ടറും ആക്ഷന്‍ കൗണ്‍സില്‍ ഭാരവാഹികളും തമ്മില്‍ ചര്‍ച്ച നടത്തിയെങ്കിലും മീഡിയന്‍ ഗ്യാപ്പ് തുറന്നുകൊടുക്കുവാന്‍ തയ്യാറായില്ലെന്ന് കൗണ്‍സില്‍ ഭാരവാഹികള്‍ ആരോപിക്കുന്നു.
ഇവിടത്തെ മീഡിയന്‍ ഗ്യാപ്പ് അപകടത്തിന് കാരണമാകുന്നുവെന്ന് ആരോപിച്ചാണ് പോലീസ് ഇത് അടച്ചത്. എന്നാല്‍ ഇതിന് മുന്‍പ് യാതൊരപകടവും ഇവിടെ ഉണ്ടായിട്ടില്ലെന്നും ആദ്യമായാണ് ഇവിടെ അപകടം സംഭവിച്ചതെന്നും കൗണ്‍സില്‍ ഭാരവാഹികള്‍ പറയുന്നു.
കൂടാതെ ഇനിയും അപകടം ഉണ്ടാകാതിരിക്കുവാന്‍ ഇവിടെയുള്ള ബസ് സ്റ്റോപ്പ് അല്‍പ്പംകൂടി പിന്നോട്ട് മാറ്റണമെന്ന് എല്ലാ മീഡിയന്‍ ഗ്യാപ്പുകളിലും സിഗ്നല്‍ലൈറ്റ് സ്ഥാപിക്കണമെന്നും ഇത് അപകടം ഇല്ലാതാക്കുവാന്‍ സഹായിക്കുമെന്നും ചൂണ്ടികാണിച്ചിട്ടും നടപടിയെടക്കുവാന്‍ ബന്ധപ്പെട്ട അധികൃതര്‍ തയ്യാറായിട്ടില്ല.
ഇത്തരം സാഹചര്യത്തിലാണ് ഹര്‍ത്താല്‍ ഉള്‍പ്പടെയുള്ള ശക്തമായ സമര പരിപാടികള്‍ ആവിഷ്‌ക്കരിക്കുവാനും ആദ്യമെന്ന നിലയില്‍ ദേശീയ പാതയില്‍ പ്രതിഷേധ ജ്വാല നടത്തുവാനും തുടര്‍ന്ന് സമരം ശക്തിപ്പെടുത്തുവാനുമാണ് ആക്ഷന്‍ കൗണ്‍സില്‍ തീരുമാനിച്ചിരിക്കുന്നത്. യോഗത്തില്‍ കണ്‍വീനര്‍ സി.കെ. പുഷ്പ്പന്‍, പഞ്ചായത്തംഗം ഇഷാദ്, ഇ.വി. തിലകന്‍, യു.സി. ഷാജി, താഹ, ജോര്‍ജ്ജ്, മജിദ് തുടങ്ങിയവര്‍ പങ്കെടുത്തു.