മലപ്പുറം: മലപ്പുറം, പൊന്നാനി മണ്ഡലങ്ങളില്‍ യു.ഡി.എഫ് സ്ഥാനാര്‍ഥികളായ മുസ്്‌ലിംലീഗ് ദേശീയ ജനറല്‍സെക്രട്ടറി പി.കെ.കുഞ്ഞാലിക്കുട്ടിയും ഓര്‍ഗനൈസിംഗ് സെക്രട്ടറി ഇ.ടി.മുഹമ്മദ് ബഷീറും വെള്ളിയാഴ്ച രാവിലെ പത്രിക സമര്‍പ്പിച്ചു.

പതിനൊന്നു മണിക്കു മുസ്്‌ലിംലീഗ് സംസ്ഥാന പ്രസിഡന്റ് ഹൈദരലി ശിഹാബ് തങ്ങളുടെ വസതിയില്‍ പ്രാര്‍ഥനയും പാണക്കാട് മഖാം സിയാറത്തും നിര്‍വഹിച്ചതിനുശേഷമാണ് ഇരുവരും യു.ഡി.എഫ് നേതാക്കളോടൊപ്പം വരണാധികാരിയായ മലപ്പുറം ജില്ലാ കലക്ടര്‍ അമിത് മീണ മുമ്പാകെ നാമനിര്‍ദേശ പത്രിക സമര്‍പ്പിച്ചത്.
ഇതോടെ ഇരു മണ്ഡലങ്ങളിലും പ്രചാരണച്ചൂടിലേക്ക് നീങ്ങുകയാണ്. വളരെ നേരത്തെ തന്നെ സ്ഥാനാര്‍ഥികളെ പ്രഖ്യാപിച്ച് ചിട്ടയായ പ്രവര്‍ത്തനത്തിലൂടെയാണ് മലപ്പുറത്തും പൊന്നാനിയിലും മുസ്ലിം ലീഗും യു.ഡി.എഫും മുന്നോട്ടു നീങ്ങുന്നത്. രണ്ടിടത്തും ശുഭ പ്രതീക്ഷയിലാണ് നിലവില്‍ സിറ്റിംഗ് എം.പിമാരായ ഇരുവരും.