കളമശ്ശേരി: ദേശീയപാതയില്‍ സ്വകാര്യ ബസുകള്‍ നടത്തിയ മത്സര ഓട്ടത്തിനിടെ നിയന്ത്രണം വിട്ട ബസ് റോഡില്‍ നിര്‍ത്തിയിട്ടിരുന്ന കാറും ട്രാഫിക് എയ്ഡ് പോസ്റ്റും ഇടിച്ച് തകര്‍ത്തു. ബസ്് യാത്രകാരായ മൂന്ന് പേര്‍ക്ക് പരുക്കേറ്റു. ആലുവ കുഞ്ഞിണ്ണിക്കര സ്വദേശി ആസിയ (32) കോട്ടപുറം സ്വദേശി എല്‍സി (55) ചെവര സ്വദേശി റോസ് മരിയ (21) എന്നിവര്‍ക്കാണ് പരുക്കേറ്റത്. ഇന്നലെ വൈകിട്ട് ആറ് മണിയോടെ കളമശ്ശേരി നഗരസഭ ഓഫിസിന് മുന്‍വശമാണ് സംഭവം.
എറണാകുളത്ത് നിന്നും ആലുവയിലേക്ക് പോയ ബസാണ് അപകടത്തില്‍പ്പെട്ടത്. തോപ്പുംപടിയില്‍ നിന്നും ആലുവയിലേക്ക് പോയ സ്വകാര്യ ബസും അപകടത്തില്‍പ്പെട്ട ബസും തമ്മില്‍ എറണാകുളം മുതല്‍ക്കേ മത്സരയോട്ടം നടത്തിവരികയായിരുന്നുവെന്ന് യാത്രക്കാര്‍ പറഞ്ഞു. ശാന്തിനഗര്‍ സ്വദേശി ഷാജി തോമസിന്റെ കാറിന്റെ പിന്നിലാണ് ബസ് ഇടിച്ചത്. ഈ സമയം കാറിനക്കത്ത് ഷാജി തോമസും കുട്ടിയും ഉണ്ടായിരുന്നു.
അപകടം നടന്ന ഉടനെതന്നെ നാട്ടുകാരും യാത്രക്കാരും ചേര്‍ന്ന അപകടം വരുത്തിയ ബസിലെ ഡ്രൈവര്‍ പള്ളുരുത്തി സ്വദേശി സജീവി(36)നെയും കണ്ടക്ടറെയും പൊലിസിനെ ഏല്‍പ്പിച്ചു. ഇയാള്‍ക്കെതിരേ അശ്രദ്ധമായി വാഹനമോടിച്ചതിന് കളമശേരി പൊലിസ് കേസെടുത്തു.