ഫറോക്ക്: വാഹനത്തില്‍ കയറ്റിക്കൊണ്ടു പോവുകയായിരുന്നു വൈക്കോല്‍ കെട്ടുകള്‍ക്ക് വൈദ്യുതി ലൈനില്‍ തട്ടി തീപിടിച്ചു. വെസ്റ്റ്‌നല്ലൂരില്‍ ഇന്നലെ ഉച്ചക്ക് 12നാണ് സംഭവം.
പാലക്കാട് നിന്നും പൊന്നേംപറമ്പത്ത് ഷിജിത്തിന്റെ വീട്ടിലേക്ക് കൊണ്ടു വരികയായിരുന്നു വൈക്കോലാണ് കത്തിനശിച്ചത്. തീപിടിത്തുമുണ്ടായ ഉടന്‍ തന്നെ വൈക്കോല്‍ കെട്ടുകള്‍ റോഡിലേക്ക് ഇറക്കി വാഹനം ദൂരെക്ക് മാറ്റിയതിനാല്‍ കൂടുതല്‍ നാശനഷ്ടങ്ങള്‍ ഒഴിവാക്കി. പിന്നീട് മീഞ്ചന്തയില്‍ നിന്നും രണ്ട് യൂണിറ്റ് അഗ്നിരക്ഷാസേനയെത്തി ഒന്നര മണിക്കൂര്‍ സമയമെടുത്താണ് തീ പൂര്‍ണമായും അണച്ചത്. സംഭവത്തെ തുടര്‍ന്ന് പൂത്തോളം മഠത്തില്‍പാടം റോഡില്‍ ഗതാഗതം തടസ്സപ്പെട്ടു.