താമരശേരി: ബസില്‍ നിന്ന് യാത്രക്കാരന്റെ പോക്കറ്റടിച്ച കേസില്‍ ഈങ്ങാപ്പുഴ കാക്കവയല്‍ നേരക്കാട്ടില്‍ തുരപ്പന്‍ എന്ന റഫീക്ക് (39)നെ താമരശേരി പൊലിസ് പിടികൂടി.
ബുധനാഴ്ച രാവിലെ 10.30തോടെ കുന്ദമംഗലത്തു നിന്ന് കെ.എസ്.ആര്‍.ടി.സി ബസില്‍ യാത്ര ചെയ്യവെ കടയപറമ്പത്ത് ബിജീഷിന്റെ 8,100 രൂപയും രേഖകളുമടങ്ങിയ പേഴ്‌സാണ് കവര്‍ന്നത്. കാരാടിയില്‍ ബസിറങ്ങിയതോടെ പേഴ്‌സ് നഷ്ടപ്പെത് ശ്രദ്ധയില്‍പ്പെട്ട ബിജീഷ് സംശയം തോന്നി യുവാവിനെ പിന്തുര്‍ന്നു. ലോട്ടറി കടയില്‍ ടിക്കറ്റ് വാങ്ങുന്നതിനിടിയില്‍ ബിജീഷ് അറിയിച്ചതിനെ തുടര്‍ന്ന എസ്.ഐ സായൂജ്കുമാറും എ.എസ്.ഐ അനില്‍കുമാറും എത്തി. അറസ്റ്റു ചെയ്യുകയായിരുന്നു.
ഇയാള്‍ക്കെതിരെ താമരശേരി, കോടഞ്ചേരി, കൊടുവള്ളി, ബാലുശേരി, മുക്കം, അത്തോളി, കാക്കൂര്‍, പേരാമ്പ്ര, കൊയിലാണ്ടി എന്നീ പൊലിസ് സ്‌റ്റേഷനുകളിലായി 30തോളം മോഷണ കേസുകളുണ്ട്. അഞ്ച് കേസുകളില്‍ ശിക്ഷയും അനുഭവിച്ചിട്ടുണ്ട്.