തളിപ്പറമ്പ്: തളിപ്പറമ്പ് സര്‍വിസ് സഹകരണ ബാങ്കിലെ ധനാപഹരണകേസില്‍ മൂന്ന് മുന്‍ ജീവനക്കാരുടെ സ്വത്ത് വിറ്റ് നഷ്ടം ഈടാക്കാന്‍ ഉത്തരവ്. ബാങ്കിന്റെ മുന്‍ സെക്രട്ടറി കെ.കെ രാഘവന്‍ നമ്പ്യാര്‍, സായാഹ്നശാഖാ മാനേജര്‍ സി. ഭാസ്‌ക്കരന്‍, പ്യൂണ്‍ എ.പി റഫീക്ക് എന്നിവരുടെ സ്വത്തുവകകള്‍ കണ്ടുകെട്ടി വില്‍പ്പന നടത്തി ബാങ്കിന് നഷ്ടമായ തുക ഈടാക്കണമെന്നാണ് സംസ്ഥാന സഹകരണ വകുപ്പ് ആര്‍ബിട്രേറ്ററുടെ ഉത്തരവ്. 4,75,43,367 രൂപയുടെ മേല്‍ 2004 മുതല്‍ 14 വര്‍ഷത്തേക്കുള്ള 12 ശതമാനം പലിശ ഉള്‍പ്പെടെ 8.25 കോടി രൂപയാണ് വസൂലാക്കേണ്ടത്. കേസില്‍ നേരത്തെ തളിപ്പറമ്പ് മജിസ്‌ട്രേറ്റ് കോടതി മൂന്ന് പ്രതികളേയും ശിക്ഷിച്ചിരുന്നെങ്കിലും ജില്ലാ സെഷന്‍സ് കോടതി രാഘവന്‍ നമ്പ്യാരേയും റഫീക്കിനേയും കുറ്റവിമുക്തരാക്കിയിരുന്നു. സി. ഭാസ്‌ക്കരന്റെ ശിക്ഷ ശരിവയ്ക്കുകയും ചെയ്തു. ഇതിനെതിരേ ബാങ്ക് അപ്പീല്‍ നല്‍കിയിട്ടുണ്ട്.
കോടികളുടെ തട്ടിപ്പ് നടന്നതിനാല്‍ ജില്ലയിലെ പ്രമുഖ എ ക്ലാസ് ബാങ്കായിരുന്ന തളിപ്പറമ്പ് സര്‍വിസ് സഹകരണ ബാങ്കിനെ സര്‍ക്കാര്‍ ബി ക്ലാസായി തരംതാഴ്ത്തിയിരുന്നു.