തൊടുപുഴ: തേനീച്ചയ്‌ക്കെതിരേ തൊടുപുഴ പൊലിസില്‍ പരാതി. തേനീച്ചയെ തുരത്താന്‍ പൊലിസിന്റെ സഹായം അഭ്യര്‍ഥിച്ച് തൊടുപുഴ കൈതക്കോട് മുണ്ടുപറമ്പില്‍ എം.എസ് ജബ്ബാറാണ് പൊലിസിനെ സമീപിച്ചത്.
 വീടിന് സമീപത്തെ മരത്തില്‍ കൂട് കൂട്ടിയിരിക്കുന്ന പെരുന്തേനീച്ച കൂട്ടത്തെ ഒഴിവാക്കണമെന്ന് ആവശ്യപ്പെട്ട് പരാതി നല്‍കിയത്.
നിരവധിപേര്‍ സഞ്ചരിക്കുന്ന റോഡരികിലെ മരത്തിലാണ് പെരുന്തേനീച്ച കൂടു കൂട്ടിയിരിക്കുന്നത്. ഇത് ഇളകിയാല്‍ പ്രശ്‌നമാകുമെന്ന് കണ്ട് ജബ്ബാര്‍ വനം വകുപ്പ്, ഫയര്‍ഫോഴ്‌സ് അധികൃതരുടെ ശ്രദ്ധയില്‍പ്പെടുത്തിയിരുന്നു.  എന്നാല്‍ നടപടി ഉണ്ടായില്ല.
തുടര്‍ന്നാണ് തൊടുപുഴ പൊലിസില്‍ പരാതി നല്‍കിയത്. ജനങ്ങളുടെ ജീവനും സ്വത്തിനും സംരക്ഷണം നല്‍കാനുള്ള കടമ പൊലിസിനുണ്ടെന്ന് മനസിലാക്കിയതുകൊണ്ടാണ് അവിടെ പരാതി നല്‍കിയതെന്നാണ് ജബ്ബാറിന്റെ വിശദീകരണം.
 എന്തായാലും പൊലിസ് പരാതി തള്ളിയില്ല.  പരാതി സ്വീകരിച്ച എസ്.ഐ ജോബിന്‍ ആന്റണി കൈപ്പറ്റ് രസീതും നല്‍കി.