കൊച്ചി: മഹാരാജാസ് കോളജില്‍ കൊലചെയ്യപ്പെട്ട അഭിമന്യുവിന്റെ ഓര്‍മകള്‍ പങ്കുവച്ച് മഹാരാജാസിലെ കെ.എസ്.യു യൂനിറ്റും. കോളജിലെ കെ.എസ്.യു പ്രവര്‍ത്തകനായ തംജിദ് താഹയാണ് അഭിമന്യുവിനെ കുറിച്ചുള്ള ഓര്‍മകള്‍ ഫെയ്‌സ്ബുക്ക് പോസ്റ്റില്‍ കുറിച്ചത്. രാഷ്ട്രീയത്തിന് അതീതമായി അഭിമന്യു കാംപസിന് എത്രത്തോളം പ്രിയപ്പെട്ടവനായിരുന്നെന്ന് വ്യക്തമാക്കുന്ന പോസ്റ്റാണിത്.
അഭിമന്യുവിന്റെ ചിരിയും സന്തോഷവും ഇതുവരെ മാഞ്ഞ് പോയിട്ടില്ലെന്നും അത്രമേല്‍ സൗഹൃദവും സന്തോഷവുമായിട്ടാണ് മഹാരാജാസിലെ ഇതര രാഷ്ട്രീയ സംഘടനകള്‍ മുന്നോട്ട് പോകുന്നതെന്നും പോസ്റ്റില്‍ വ്യക്തമാക്കുന്നു. 'അഭിമന്യുവിനെ പോലുള്ളവര്‍ ഇവിടെ ഉള്ളതിനാല്‍ ഒന്നര വര്‍ഷമായിട്ട് ഒരു ചെറിയ അടി പോലും കാംപസില്‍ ഉണ്ടായിട്ടില്ല. ലോകകപ്പ് ഫുട്‌ബോള്‍ തുടങ്ങിയപ്പോള്‍ അതിന്റെ ആവേശത്തില്‍ കെ.എസ്.യു കാംപസില്‍ സംഘടിപ്പിച്ച മത്സരത്തില്‍ പങ്കെടുക്കാനായി ആദ്യമെത്തിയത് അഭിമന്യു ആയിരുന്നു '- തംജിദ് പറയുന്നു. അവന്റെ അന്നത്തെ ചിരിയും സന്തോഷവും ഇതുവരെ മാഞ്ഞ് പോയിട്ടില്ലെന്നും പോസ്റ്റില്‍ പറയുന്നു.