ആലപ്പുഴ : പുതുതായി സര്‍വിസ് ആരംഭിച്ച ഗാന്ധിധാം- തിരുനെല്‍വേലി എക്‌സ്പ്രസിന് ആലപ്പുഴയിലും, കായംകുളത്തും സ്റ്റോപ്പ് അനുവദിക്കണമെന്നാവശ്യപ്പെട്ട് കെ.സി വേണുഗോപാല്‍ എം.പി കേന്ദ്ര റെയില്‍വേ മന്ത്രിക്കു കത്തയച്ചു.
നേരത്തെ പ്രസിദ്ധീകരിച്ച സമയ പട്ടിക പ്രകാരം ഹംസഫര്‍ എക്‌സ്പ്രസിന് ആലപ്പുഴയിലും കായംകുളത്തും സ്റ്റോപ്പ് ഉണ്ടെന്നാണ് റെയില്‍വേ അറിയിച്ചിരുന്നത്.
എന്നാല്‍ ട്രെയിന്‍ സര്‍വീസ് ആരംഭിച്ചപ്പോള്‍ എറണാകുളം ജങ്ഷന്‍ കഴിഞ്ഞാല്‍ തിരുവനന്തപുരത്തു മാത്രമേ സ്റ്റോപ്പ് ഉള്ളൂ. അന്ത്യോദയ എക്‌സ്പ്രസ്സ് ആരംഭിച്ചപ്പോഴും നേരത്തെ പ്രഖ്യാപിച്ച സമയ പട്ടികക്ക് വിരുദ്ധമായാണ് സ്റ്റോപ്പുകള്‍ അനുവദിച്ചത്.
ജില്ലാ ആസ്ഥാനവും പ്രധാന വിനോദ സഞ്ചാര കേന്ദ്രവുമായ ആലപ്പുഴയിലും, റെയില്‍വേക്കു ഏറ്റവും കൂടുതല്‍ വരുമാനം നല്‍കുന്ന കായംകുളത്തും സ്റ്റോപ്പ് അനുവദിക്കാത്തത് യാത്രക്കാരോടുള്ള കടുത്ത അവഗണനയാണെന്നു കെ.സി വേണുഗോപാല്‍ എം.പി കത്തില്‍ ചൂണ്ടിക്കാട്ടി.