ന്യൂഡല്‍ഹി: ഈ വര്‍ഷം നടക്കുന്ന ഗുജറാത്ത്, ഹിമാചല്‍ പ്രദേശ് നിയമസഭാ തെരഞ്ഞെടുപ്പുകളില്‍ പേപ്പര്‍ ട്രയിലോടെയുള്ള വോട്ടിങ് മെഷിനുകള്‍(വിവിപാറ്റ്) ഉപയോഗിക്കുമെന്ന് തെരഞ്ഞെടുപ്പ് കമ്മിഷന്‍. വോട്ടു ചെയ്യുമ്പോള്‍ വോട്ടര്‍മാര്‍ക്ക് വിശദാംശങ്ങള്‍ രേഖപ്പെടുത്തിയ സ്ലിപ്പ് ലഭിക്കുന്നതാണ് പേപ്പര്‍ ട്രയില്‍. ഇതുസംബന്ധിച്ച് തെരഞ്ഞെടുപ്പ് കമ്മിഷന്റെ നിര്‍ദേശത്തിന് കേന്ദ്ര സര്‍ക്കാര്‍ അംഗീകാരം നല്‍കിയിരുന്നു.
പുതിയ 30,000ത്തോളം പുതിയ മെഷിനുകള്‍ ജൂലൈയില്‍ ലഭിച്ചു തുടങ്ങുമെന്ന് തെരഞ്ഞെടുപ്പ് കമ്മിഷന്‍ അറിയിച്ചു. ഈ രണ്ടു സംസ്ഥാനങ്ങളിലും എല്ലാ മണ്ഡലങ്ങളിലും പേപ്പര്‍ ട്രയിലോടെയുള്ള വോട്ടിങ് മെഷിനുകളാണ് ഉപയോഗിക്കുക.
നിലവില്‍ 53,500 മെഷിനുകള്‍ കമ്മിഷന്റെ കൈവശമുണ്ട്. പേപ്പര്‍ ട്രയില്‍ പ്രകാരം വോട്ടു ചെയ്യാനുദ്ദേശിച്ച സ്ഥാനാര്‍ഥിക്കുതന്നെ കൃത്യമായി വോട്ടു രേഖപ്പെടുത്തിയോ എന്ന് വോട്ടര്‍ക്ക് തിരിച്ചറിയാനാവും. അടുത്തിടെ നടന്ന നിയമസഭാ തെരഞ്ഞെടുപ്പുകളില്‍ വോട്ടിങ് യന്ത്രത്തില്‍ തിരിമറി നടന്നെന്ന ആരോപണത്തെ തുടര്‍ന്നാണ് പുതിയ രീതി കമ്മിഷന്‍ പരീക്ഷിക്കുന്നത്.