കോഴിക്കോട്: കൊയിലാണ്ടി മുചുകുന്ന് ഗവണ്‍മെന്റ് കോളജില്‍ എം.എസ്.എഫ് പ്രവര്‍ത്തര്‍ക്കെതിരായ കൊലവിളി മുദ്രാവാക്യത്തില്‍ കേസെടുത്ത് പൊലിസ്. കാനത്തില്‍ ജമീല എം.എല്‍.എയുടെ സ്റ്റാഫ് വൈശാഖ് അടക്കം 60 ഡി.വൈ.എഫ്.ഐ പ്രവര്‍ത്തകര്‍ക്കെതിരെയാണ് പൊലിസ് കേസെടുത്തത്. എം.എസ്.എഫ് നല്‍കിയ പരാതിയിലാണ് കേസെടുത്തത്. നിയമ വിരുദ്ധമായി സംഘം ചേരല്‍, ഭീഷണിപ്പെടുത്തല്‍ ഉള്‍പ്പെടെയുള്ള വകുപ്പുകളാണ് ചുമത്തിയത്.

കാലിക്കറ്റ് സര്‍വകലാശാല കോളേജ് യൂണിയന്‍ തെരഞ്ഞെടുപ്പിനോടനുബന്ധിച്ചാണ് കൊയിലാണ്ടി കോളജില്‍ സംഘര്‍ഷമുണ്ടായത്. തുടര്‍ന്ന് യൂത്ത് കോണ്‍ഗ്രസിന്റെയും മുസ് ലിം യൂത്ത് ലീഗിന്റെയും കെ.എസ്.യുവിന്റെയും എം.എസ്.എഫിന്റെയും പ്രവര്‍ത്തകര്‍ക്ക് നേരെ ഡി.വൈ.എഫ്.ഐ പ്രവര്‍ത്തകര്‍ പ്രകോപനപരമായ മുദ്രാവാക്യം വിളിക്കുകയായിരുന്നു. ഇതിന്റെ ദൃശ്യങ്ങള്‍ സമൂഹമാധ്യമങ്ങളിലും പ്രചരിച്ചിരുന്നു.

തെരഞ്ഞെടുപ്പില്‍ മത്സരിച്ച പെണ്‍കുട്ടികള്‍ ഉള്‍പ്പടെയുള്ള യു.ഡി.എസ്.എഫ് പ്രവര്‍ത്തകരെ കോളജ് തടഞ്ഞുവെക്കുന്ന സ്ഥിതിയുണ്ടായി. വോട്ടെണ്ണലിന് ശേഷം സംഘടിച്ചെത്തിയ എസ്.എഫ്.ഐ പ്രവര്‍ത്തകര്‍ വോട്ടെണ്ണല്‍ ഹാളില്‍ ഇരിക്കുകയായിരുന്ന വിദ്യാര്‍ത്ഥികള്‍ക്ക് നേരെ കല്ലെറിയുകയും പുറത്തിറങ്ങാന്‍ സമ്മതിക്കാതെ ഭീകരാന്തരീക്ഷം സൃഷ്ടിക്കുകയും ചെയ്തിരുന്നു. ഒടുവില്‍ കുറ്റ്യാടി പൊലിസ് എത്തിയാണ് വിദ്യാര്‍ത്ഥികളെ ഹാളില്‍ നിന്നും പുറത്തിറക്കിയത്.